ខេត្តកំពង់ចាម ៖ ចៅភ្លោះ៣របស់សម្ដេចតេជោ ហ៊ុន សែន បានប្រសូតនៅមណ្ឌលសុខភាពពាមជីលាំង ឃុំពាមជីលាំង ស្រុកត្បូងឃ្មុំខេត្តត្បូងឃ្មុំ កាលពីរសៀលថ្ងៃទី៦ ខែវិច្ឆិកា ប៉ុន្តែដោយសារតែសុខភាពខ្សោយនោះ ចៅភ្លោះទាំង៣ត្រូវបានជីដូននាំយកមកសង្គ្រោះដោយដាក់ចិញ្ចឹមនៅក្នុងកែវវិទ្យាសាស្ត្រនៅមន្ទីរពេទ្យបង្អែកខេត្តកំពង់ចាម ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សស្ត្រីឈ្មោះ ផៃ ដានី អាយុ៣០ឆ្នាំ រស់នៅក្នុងឃុំពាមជីលាំង ប្រាប់ឲ្យដឹងថា ក្នុងពេលដែលប្អូនស្រី គាត់ឈ្មោះ ផៃ ធារី អាយុ២៧ឆ្នាំ មានផ្ទៃពោះ៥ទៅ ៦ខែ បានទៅពិនិត្យអេកូនៅកំពង់ឫស្សី ក្នុងឃុំរកាពប្រាំ ស្រុកត្បូងឃ្មុំ ឃើញកូនភ្លោះតែមិនច្បាស់ថា ៣នាក់ទេ សូមឲ្យតាមដានបន្ថែម ។
គាត់បន្តថា លុះមកដល់វេលាម៉ោង២និង៣០នាទីរសៀលថ្ងៃទី៦ ខែវិច្ឆិកា ឆ្នាំ២០១៩ ប្អូនស្រីគាត់កើតបានកូនភ្លោះប្រុសបីនាក់ ក្នុងនោះកូនបងគេទម្ងន់១គីឡូក្រាម ទីពីរទម្ងន់១,៥០គីឡូក្រាម និងទីបីទម្ងន់១,៩៥គីឡូក្រាម។ ដោយសារតែសុខភាពរបស់ក្មួយភ្លោះទាំង៣ខ្សោយ ក៏ប្រញាប់ដឹកមកសង្គ្រោះដោយដាក់ចិញ្ចឹមក្នុងកែវវិទ្យាសាស្ត្រ នៅមន្ទីរពេទ្យបង្អែកខេត្តកំពង់ចាម ហើយក្រោមការយកចិត្តទុកដាក់របស់គ្រូពេទ្យ រហូតមកដល់ព្រឹកថ្ងៃទី៧ វិច្ឆិកា គឺសុខភាពរបស់ក្មួយភ្លោះទាំង៣ប្រសើរបន្តិចហើយ ។
ស្ត្រីជាបងបន្តថា ក្នុងពេលប្អូនស្រីមានផ្ទៃ ពោះបានយល់សប្តិឃើញគេឲ្យកងដៃចំនួន៣លុះពេលកើតបានកូនភ្លោះបីនាក់ ។ សព្វថ្ងៃនេះជីវភាពរបស់ប្អូនស្រីនិងប្ដីរស់នៅជាមួយម្ដាយចំណាស់់ដែលមានជីវភាពខ្សត់ខ្សោយ ដោយប្រកបរបរធ្វើស្រែ ។ ប្អូនស្រីដែលត្រូវជាម្ដាយរបស់កូនភ្លោះបី មិនបានមកសម្រាកនៅមន្ទីរពេទ្យបង្អែកខេត្តកំពង់ចាមទេ គឺសម្រាកនៅឯផ្ទះដោយមានប្ដីមើលថែរក្សា ។
អ្នកស្រី ធីម ថា អាយុ៥២ឆ្នាំ ត្រូវជាជីដូនបង្កើតរបស់កូនភ្លោះបីនាក់ និយាយថា ក្នុងពេលកូនស្រីគាត់ឆ្លងទន្លេនៅមណ្ឌលសុខភាពពាមជីលាំង គាត់មិនបានទៅជាមួយទេ ។ លុះនៅពេលដឹងថាសម្រាលបានកូនភ្លោះ៣ ហើយសុខភាពរបស់ចៅមិនសូវធានាប៉ុន្មាននោះ ក៏ប្រញាប់ធ្វើដំណើរមកឃុំពាមជីលាំង ស្រុកត្បូងឃ្មុំ រួចយកចៅប្រុសទាំង៣នាក់មកសង្គ្រោះនៅមន្ទីរពេទ្យបង្អែកខេត្តកំពង់ចាម ។
ជីដូនរូបនេះ បញ្ជាក់ថា កាលពីមុនគាត់ធ្លាប់ឆ្លងទន្លេបានកូនភ្លោះបីដែរ ប៉ុន្តែកូនបង និងពៅបានស្លាប់ទៅហើយ នៅសល់តែកូនកណ្ដាលសព្វថ្ងៃអាយុ៣២ឆ្នាំ ដែលជាអ្នកមើលថែរក្សារូបគាត់សព្វថ្ងៃ នៅឃុំឈូក ស្រុកក្រូចឆ្មារ ។
ជាចុងក្រោយ គាត់បានលើកម្រាមដៃដប់សំពះដល់សម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន សូមជួយសង្គ្រោះចៅភ្លោះទាំងបីនាក់របស់គាត់ឱ្យបានរស់ផង ។ គាត់មានជំនឿយ៉ាងមុតមាំថា សម្ដេចតេជានឹងជួយដល់ចៅទាំងបីនាក់ ព្រោះសម្ដេចតែងចាត់ទុកថា ឲ្យតែប្រជាពលរដ្ឋកម្ពុជាប្រសូតបានកូនភ្លោះ៣ គឺជាចៅរបស់សម្ដេច ។
បើតាមគ្រូពេទ្យនៅមន្ទីរពេទ្យបង្អែកខេត្តកំពង់ចាមប្រាប់ថា កូនភ្លោះ៣នាក់នេះកើតមិន គ្រប់ខែ ដោយម្ដាយមានផ្ទៃពោះជាង៨ខែក៏ប្រសូត ។ កត្តានេះអាចធ្វើឱ្យសុខភាពរបស់កូនមិនសូវល្អ តែទោះបីជាយ៉ាងណាក៏ដោយ គ្រូពេទ្យនឹងប្រឹងថែទាំសង្គ្រោះកូនភ្លោះទាំងបីនាក់ ៕
ប្រភព៖ កោះសន្តិភាព