ចិន៖ ក្រុមហ៊ុនទូរគមនាគមន៍យក្សចិន Huawei Technologies បាននិយាយកាលពីថ្ងៃអង្គារថា ខ្លួននឹងប្រគល់រង្វាន់ជាសាច់ប្រាក់ចំនួន ២ ពាន់លានយ័ន (២៨៦ លានដុល្លារ) ដល់បុគ្គលិកដែលធ្វើការដើម្បីឲ្យគេចផុតពីការរារាំងនៃជំនួញពាណិជ្ជកម្មសហរដ្ឋអាមេរិក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រុមហ៊ុនផ្គត់ផ្គង់ឧបករណ៍ទូរគមនាគមន៍ធំជាងគេបំផុតនៅលើពិភពលោកបាននិយាយថា ខ្លួនបាននិងកំពុងព្យាយាមរកវិធីផ្សេងៗដើម្បីគេចផុតពីការរារាំងរបស់សហរដ្ឋអាមេរិក បន្ទាប់ពីក្រុមហ៊ុនត្រូវបានហាមឃាត់នៅក្នុងខែឧសភាពីការធ្វើជំនួញជាមួយក្រុមហ៊ុនអាមេរិក ដែលធ្វើឲ្យប៉ះពាល់ដល់សមត្ថភាពរបស់ខ្លួនក្នុងការស្វែងរកប្រភពសំខាន់ៗ។
នាយកដ្ឋានធនធានមនុស្សរបស់ក្រុមហ៊ុន Huawei បាននិយាយនៅក្នុងសេចក្តីជូនដំណឹងដល់បុគ្គលិក ដែលត្រូវបានបង្ហោះដោយគេហទំព័រសារព័ត៌មាន REUTERS ថា ប្រាក់ទាំងនោះគឺជាការទទួលស្គាល់សម្រាប់ការងារដែលត្រូវប្រឈមមុខនឹងសម្ពាធសហរដ្ឋអាមេរិក។ អ្នកនាំពាក្យក្រុមហ៊ុនបាននិយាយថា ក្រុមហ៊ុនក៏នឹងផ្តល់ប្រាក់ខែទ្វេដងផងដែរសម្រាប់ខែនេះដល់កម្មករជិត ១៩០,០០០ នាក់។
អ្នកនាំពាក្យរូបនេះបាននិយាយថា រង្វាន់ជាសាច់ប្រាក់ទំនងជានឹងទៅដល់ក្រុមស្រាវជ្រាវ អភិវឌ្ឍន៍និងអ្នកដែលធ្វើការដើម្បីផ្លាស់ប្តូរខ្សែសង្វាក់ផ្គត់ផ្គង់របស់ក្រុមហ៊ុន ដើម្បីឲ្យគេចផុតពីការគំរាមគំហែងរបស់សហរដ្ឋអាមេរិក។
ព័ត៌មានលម្អិតអំពីផែនការរបស់ក្រុមហ៊ុន Huawei ត្រូវបានរាយការណ៍ជាលើកដំបូងដោយកាសែត South China Morning Post កាលពីថ្ងៃអង្គារ។
គួររម្លឹកឡើងវិញថា មនុស្សជាច្រើននៅក្នុងជួររដ្ឋាភិបាលសហរដ្ឋអាមេរិកជឿថា ឧបករណ៍របស់ក្រុមហ៊ុន Huawei ជាពិសេសបណ្តាញ 5G របស់ខ្លួនបង្កហានិភ័យដល់សុវត្ថិភាព ដោយសារតែក្រុមហ៊ុននេះមានទំនាក់ទំនងជិតស្និទ្ធនឹងរដ្ឋាភិបាលចិន។ ក្រុមហ៊ុន Huawei បានបដិសេធថា រដ្ឋាភិបាលចិនមិនបានដើរតួនាទីណាមួយនៅក្នុងប្រតិបត្តិការរបស់ខ្លួនឡើយ។
បើទោះបីត្រូវទទួលការពិន័យពីសហរដ្ឋអាមេរិកក៏ដោយ ក៏ក្រុមហ៊ុន Huawei បាននិងកំពុងធ្វើការដើម្បីស្វែងរកវិធីសាស្ត្រផ្សេងៗ បន្ទាប់ពីបានមើលឃើញពីផលប៉ះពាល់នៃការដាក់ទណ្ឌកម្មរបស់សហរដ្ឋអាមេរិកទៅលើក្រុមហ៊ុនគូប្រជែងតូចរបស់ខ្លួនគឺក្រុមហ៊ុន ZTE Corp (000063.SZ) នៅដើមឆ្នាំ ២០១៧ ក៏ដោយ ។
ក្រុមហ៊ុននេះក៏ជាក្រុមហ៊ុនផលិតស្មាតហ្វូនធំលំដាប់ទី ២ នៅលើពិភពលោកផងដែរ ហើយការកើនឡើងនៃការនាំចេញឧបករណ៍បានជួយឱ្យក្រុមហ៊ុននេះកើនប្រាក់ចំណូល ២៧ ភាគរយក្នុងត្រីមាសទី ៣ កាលពីខែមុន៕