រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នារីជាជនជាតិចិនម្នាក់ត្រូវបានគេសង្ស័យថា លោតពីអគារខុនដូជាន់ទី12 ខណៈពេលឈ្លោះប្រកែកគ្នាជាមួយសង្សារ ព្រោះតែខឹងរឿងសុំបែកគ្នា បង្កឱ្យមានការភ្ញាក់ផ្អើលនេះកាលពីម៉ោង1និង50នាទីរំលងអធ្រាត្រឈានចូលថ្ងៃទី14 ខែវិច្ឆិកា ឆ្នាំ២០១៩ នៅអគារខុនដូ បាលី(2) ផ្លូវចូលស្ពានហង្សកោះពេជ្រ ស្ថិតក្នុងភូមិ14 ក្រុម78 សង្កាត់ទន្លេបាសាក់ ខណ្ឌចំការមន ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសេចក្តីរាយការណ៍បន្តថា នារីរងគ្រោះខាងលើនេះ នៅមិនទាន់ស្គាល់អត្តសញ្ញាណពិតនៅឡើយទេ គ្រាន់តែដឹងថា គេហៅនាងឈ្មោះ ម៉ីម៉ី អាយុ28ឆ្នាំ ស្នាក់នៅខុនដូកើតហេតុជាន់ទី17 បន្ទប់B01 មុខរបរជាងធ្វើក្រចក។ ចំណែកបុរសជាសង្សារនារីរងគ្រោះឈ្មោះ ហ្វឹង ឡុង អាយុ28ឆ្នាំ មុខអ្នកបើករថយន្តតាក់ស៊ីនៅព្រលានយន្តហោះពោធិ៍ចិនតុង ស្នាក់នៅជាន់ទី12 បន្ទប់A06 ជាកន្លែងកើតហេតុ ។
តាមសម្តីបុរសជាសង្សារនារីរងគ្រោះប្រាប់ឱ្យដឹងថា ខ្លួននឹងសង្សារស្គាល់គ្នាយូរហើយ តែមួយរយៈពេលចុងក្រោយក៏ឈ្លោះប្រកែកគ្នារឿងខ្លួនសុំបែកគ្នា ។ ហើយមុនកើតហេតុ គឺនារីរងគ្រោះ ទើបនឹងត្រឡប់មកពីញ៉ាំស្រានៅខាងក្រៅ លុះស្រវឹងក៏មករកខ្លួនដល់បន្ទប់ស្នាក់នៅជាន់ទី12 បន្ទប់A06 ដោយស្រែកប្រកែកឈ្លោះគ្នាជាមួយខ្លួនរឿងសុំបែកគ្នា ខណៈនោះខ្លួនបានឱ្យនាងអង្គុយស្ងៀមសិន ទៅនិយាយគ្នាតាមសម្រួលក៏បាន។
ប្រភពដដែលបន្តទៀតថា ខណៈពេលឈ្លោះគ្នានោះ នារីរងគ្រោះគាត់ស្រែកទឹក ក៏ឱ្យបុរសជាសង្សារចូលទៅយកទឹកមកឱ្យខ្លួនផឹក ខណៈពេលរូបគេទៅរកទឹក ស្រាប់តែនារីរងគ្រោះរត់ចេញមកក្រៅបន្ទប់លោតសម្លាប់ខ្លួនឯងតែម្ដង។ ភ្លាមៗនោះរូបគាត់បានចុះទៅមើលនារីរងគ្រោះ និងបានដោះអាវគ្របមុខសពនារីរងគ្រោះជាសង្សារខ្លួនទាំងក្តីសោកស្ដាយ តែពេលឃើញសមត្ថកិច្ចទៅដល់កន្លែងកើតហេតុ ធ្វើឱ្យខ្លួនភ័យស្លន់ស្លោក៏រត់ទៅឡើងទៅលើបន្ទប់វិញ និងទូរស័ព្ទហៅមិត្តភ័ក្ដិម្នាក់ទៀតឈ្មោះ ចូវ ជ៊ែម៉ឹង ភេទប្រុស អាយុ29ឆ្នាំ ស្នាក់នៅខុនដូជាមួយគ្នាដែរ ជាន់ទី24 បន្ទប់លេខA06 ឱ្យមកជួយខ្លួន រំដោះរូបគេ រត់គេច ព្រោះខ្លួនខ្លាចសមត្ថកិច្ចឃាត់។
ប្រភពដដែលបន្តទៀតថា តែខណៈពេលចុះមកដល់ក្រោមបម្រុងរត់ចេញក្រៅតាមទ្វារក្រោយក៏ត្រូវសមត្ថកិច្ច និងសន្តិសុខខុនដូឃាត់ខ្លួនបានភ្លាមៗតែម្តង ហើយនាំមកកាន់ប៉ុស្តិ៍នគរបាលរដ្ឋបាលសង្កាត់ទន្លេរបាសាក់ ដើម្បីសួរនាំបណ្តោះអាសន្ន។
ចំពោះករណីខាងលើនេះ មិនមានសាក្សីណាម្នាក់ហ៊ានអះអាងថា ជាករណីលោតសម្លាប់ខ្លួនដោយធ្វើអត្តឃាត ឬការស្លាប់នេះជាប់ពាក់ព័ន្ធជាមួយបុរសជាសង្សារនៅឡើយទេ ហើយខណៈពេលនេះសមត្ថកិច្ចកំពុងតែស្រាវជ្រាវបន្តទៀត ។
បច្ចុប្បន្នបុរសជាសង្សារនារីរងគ្រោះ រួមនឹងមិត្តភ័ក្ដិ ត្រូវបានសមត្ថកិច្ចឃាត់ខ្លួនបណ្តោះអាសន្ន ដើម្បីស្រាវជ្រាវបន្តជុំវិញករណីនេះ។ ចំណែកសពនារីរងគ្រោះត្រូវបានកម្លាំងសមត្ថកិច្ចជំនាញកោសល្យវិច្ឆ័យ រួចដឹកសពយកទៅតម្កល់បណ្តោះអាសន្ននៅវត្តស្ទឹងមានជ័យ រង់ចាំធ្វើកោសល្យវិច្ឆ័យលម្អិតលើសពនារីរងគ្រោះ ក៏ដូចជាកន្លែងកើតហេតុ ដើម្បីរកមូលហេតុពិតប្រាកដជុំវិញការស្លាប់របស់នារីរងគ្រោះ ។
ប្រភព៖ កោះសន្តិភាព