លើសជាតិស្ករហើយ Camila និង Shawn អង្គុយបឺតមាត់គ្នាកណ្តាលតារាងបាល់បោះ មិនក្រែងចិត្តទស្សនិកជន!

អាមេរិក៖ មកទល់បច្ចុប្បន្ននេះ រូបថតថើបគ្នាផ្អែមល្ហែមនៅតាមទីសាធារណៈ រវាងតារាចម្រៀងប្រុសស្រី Shawn Mendes និង Camila Cabello ក្លាយទៅជារឿងធម្មតាទៅហើយ សម្រាប់អ្នកគាំទ្រ ក៏ដូចជាបណ្តាប្រិយមិត្តនៅលើបណ្តាញទំនាក់ទំនងសង្គម។

ជាក់ស្តែង ក៏ដូចជាថ្មីៗនេះ គូស្នេហ៍ថ្មីថ្មោងមួយគូនេះ បានដឹកដៃគ្នាទៅទស្សនាការប្រកួតកីឡាបាល់បោះ NBA នៅឯមជ្ឍមណ្ឌល Staples Center Arena ។ ដោយឡែក ជំនួសដោយការទស្សនាបាល់បោះ បែរជាគេសង្កេតឃើញថា គូស្នេហ៍ដ៏គួរឲ្យស្រលាញ់មួយគូនេះ អង្គុយសាសងគ្នាយ៉ាងផ្អែមល្ហែម ជជែកគ្នាបណ្តើរសើចបណ្តើរយ៉ាងមានក្តីសុខ និងថែមទាំងឱបថើបគ្នាជាញឹកញាប់ ធ្វើឲ្យទស្សនិកជនដែលមកទស្សនាបាល់បោះទាំងអស់ ស្ទើរតែលើសជាតិស្ករដោយសារតែ អ្នកទាំងពីរថែមទៀតផង។

គួរឲ្យដឹងថា ចាប់តាំងពី Shawn Mendes និង Camila Cabello បើកចំហរស្នេហាជាសាធារណៈមក គេតែងតែឃើញអ្នកទាំងពីរបង្ហាញភាពផ្អែមល្ហែម ទាំងនៅលើបណ្តាញសង្គម ក៏ដូចជាបណ្តើរគ្នាយ៉ាងត្រសងនៅតាមផ្លូវ រហូតត្រូវបានក្រុមអ្នកកាសែតថតបានជាញឹកញាប់ផងដែរ៕