សោកស្តាយផង! ឆ្នាំនេះ YG ធ្លាក់ពីតារាងផលិតកម្មយក្ស Top 3 ដែលលក់អាល់ប៊ុមដាច់ជាងគេប្រចាំឆ្នាំ ២០១៩

កូរ៉េខាងត្បួង៖ កាលពីថ្មីៗនេះ ផ្អែកតាមតារាងផលិតកម្មកំពូលដែលលក់អាល់ប៊ុមដាច់ជាងគេប្រចាំឆ្នាំ បានធ្វើឲ្យអ្នកគាំទ្រភ្ញាក់ផ្អើលមែនទែន ក្រោយឃើញផលិតកម្ម YG ធ្លាក់ពីកំពូល Top៣ មកដល់លេខ៥វិញសម្រាប់ឆ្នាំនេះ។

គួរឲ្យដឹងផងដែរថា ផលិតកម្ម YG គឺជាត្រូវបានគេស្គាល់ថាជាផលិតកម្មយក្សក្នុងចំណោមផលិតកម្មកំពូលទាំង៣ នៅក្នុងប្រទេសកូរ៉េ រួមជាមួយផលិកកម្ម SM និងផលិតកម្ម JYP ក៏ប៉ុន្តែនៅពេលនេះផលិតកម្ម YG ត្រូវបានផលិតកម្ម BigHit និងផលិតកម្ម Plesdis ទម្លាក់ធ្លាក់មកត្រឹមចំណាត់ថ្នាក់លេខ ៥ ទៅវិញ។

យ៉ាងណាមិញ សម្រាប់តារាងផលិតកម្មដែលលក់អាល់ប៊ុមច្រើនជាងគេសម្រាប់ឆ្នាំនេះ គឺគិតរាប់ចាប់ពីខែមករា ឆ្នាំ ២០១៩ ដល់ខែតុលា ឆ្នាំ ២០១៩ ដោយក្នុងនោះបានបង្ហាញឲ្យឃើញថា ផលិតកម្ម BigHit បានឈនៅលំដាប់ថ្នាក់លេខ១ ក្នុងការលក់អាល់ប៊ុមចំនួន ៦,៣១២,៤០៩ ឯចំណែកលេខ២គឺផលិតកម្ម SM ដោយលក់បានអាល់ប៊ុមចំនួន ៣,៧១៤,០៧៩ និងលេខ៣ និងលេខ ៤ បានទៅលើផលិតកម្ម​ JYP និងផលិតកម្ម Pledis។

គួររម្លឹកផងដែរថា ឆ្នាំ២០១៩នេះគឺហាក់ដូចជាឆ្នាំដ៏យ៉ាប់យឺនមួយសម្រាប់ផលិតកម្ម YG ព្រោះថាផលិតកម្មនេះបានជួបបញ្ហាជាច្រើនទាក់ទឹងនឹងសមាជិកក្រុម BIGBANG លោក Seungri រឿងរ៉ាវផ្សេងៗទៀតទាក់ទងនឹងលោក B.I សមាជិកក្រុម iKon សង្ស័យប្រើប្រាស់គ្រឿងញៀន និងរឿងមិនបន្តកុងត្រារបស់នាង CL ដែលជាហេតុធ្វើឲ្យតម្លៃស្តុករបស់ផលិតកម្មនេះ ធ្លាក់ចុះជាលំដាប់៕

តើប្រិយមិត្តយល់យ៉ាងណាដែរ?