រាជធានីភ្នំពេញ ៖ ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកនៅថ្ងៃបុណ្យអុំទូកខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវដល់អ្នកបើកបរតាមផ្លូវ ត្រូវមានការប្រុងប្រយ័ត្នឱ្យបានខ្ពស់នៅពេលបើកបរ ឬធ្វើដំណើរតាមដងផ្លូវ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមសេចក្តីអំពាវនាវស្តីពីការបង្ការ ទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ឆ្នាំ២០១៩របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញផ្សាយនៅថ្ងៃទី៧វិច្ឆិកា ដោយបានលើកឡើងថា ក្នុងកាល:ទេស:ដែលព្រះរាជាណាចក្រកម្ពុជាមានសុខសន្តិភាព ស្ថេរភាពនយោបាយ និងការអភិវឌ្ឍលើគ្រប់វិស័យ ដែលនាំឱ្យប្រជាពលរដ្ឋកម្ពុជា មានជីវភាពកាន់តែល្អប្រសើរជាលំដាប់ អាចទិញយានយន្ត និងធ្វើដំណើរកំសាន្តយ៉ាងមមាញឹកក្នុងឱកាសបុណ្យជាតិ និងថ្ងៃឈប់សម្រាកនានា ជាពិសេសក្នុងឱកាសដ៏រីករាយនៃការប្រារព្ធព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ភ្ជាប់ជាមួយនឹងបុណ្យឯករាជ្យជាតិ និងពិធីពិសារអំបុក ខ្មែរ ជាតិសាសនា ព្រះមហាក្សត្រ ចាប់ពីថ្ងៃទី៩ រហូតដល់ថ្ងៃទី១២ ខែវិច្ឆិកា ឆ្នាំ២០១៩ ។
គណៈកម្មាធិការជាតិសុវត្ថិភាពចរាចរណ៍ផ្លូវគោក សូមធ្វើការអំពាវនាវដល់សាធារណជន ជាអ្នកប្រើប្រាស់ផ្លូវទាំងអស់ មេត្តាចូលរួមចំណែកក្នុងការបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ដើម្បីថែរក្សា ការពារការបាត់បង់អាយុជីវិត និងកាយសម្បទាមនុស្សជាទីស្រឡាញ់ ឬរងរបួស ពិការ និងបាត់បង់ទ្រព្យសម្បត្តិរបស់រដ្ឋ ព្រមទាំងឯកជនក្នុងគ្រោះថ្នាក់ចរាចរណ៍ ដោយសូមយកចិត្តទុកដាក់លើកកម្ពស់ការប្រុងប្រយ័ត្នក្នុងពេលដំណើរតាមផ្លូវថ្នល់ ។
គណៈកម្មាធិការក៏បានអំពាវនាវចំនួន១០ចំណុចដូចខាងក្រោម ៖១-ត្រូវពាក់មួកសុវត្ថិភាពដែលមានគុណភាពឱ្យបានត្រឹមត្រូវជានិច្ច ក្នុងពេលធ្វើដំណើរតាមទោចក្រយានយន្ត។
២-មិនត្រូវបើកបរលើសល្បឿនកំណត់ ព្រោះអាចបាត់បង់ស្មារតីគ្រប់គ្រងយានយន្តពេលជួបឧបសគ្គ ជាយថាហេតុ។
៣-មិនត្រូវបើកបរ ក្រោយការពិសារគ្រឿងស្រវឹង។
៤-ត្រូវគោរពសិទ្ធិអាទិភាព ដោយត្រូវទុកឱ្យអ្នកបើកបរផ្លូវធំ ហើយត្រង់ទៅមុន គោរពសញ្ញាចរាចរណ៍ និងប្រកាន់ស្តាំជានិច្ច។
៥-ត្រូវពាក់ខ្សែក្រវាត់សុវត្ថិភាពជានិច្ចក្នុងពេលធ្វើដំណើរតាមរថយន្ត។
៦-មិនត្រូវបត់ ឬ វ៉ាជែងក្នុងភាពប្រថុយប្រថាន និង មិនត្រូវប្រើទូរស័ព្ទដោយគ្មានឧបករណ៍បន្តសំឡេងក្នុងពេលបើកបរ។
៧-ត្រូវត្រួតពិនិត្យលក្ខណៈបច្ចេកទេសយានយន្តឱ្យបានម៉ត់ចត់ ពិសេសពិនិត្យកង់ ចង្កេត ឈឿង ភ្លើងបំភ្លឺ។ល។
៨-មិនត្រូវផ្ទុកអ្នកដំណើរ ឬដឹកទំនិញសំពីងសំពោងលើសចំនួនផ្ទុក ឬលើសទម្ងន់កំណត់ក្នុងច្បាប់ និងសូមមេត្តាកុំដំឡើងថ្លៃដឹកជញ្ជូន។
៩-មិនត្រូវបើកបរក្នុងស្ថានភាពងងុយ ជាដាច់ខាត។
១០-ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌ យោគយល់អាធ្យាស្រ័យ។
គណៈកម្មាធិការជាតិសុវត្ថិភាពចរាចរណ៍ផ្លូវគោក សូមសម្ដែងនូវសេចក្តីសង្ឃឹមជឿជាក់លើអ្នកប្រើប្រាស់ផ្លូវគ្រប់រូប នឹងបង្កើនស្មារតីចូលរួមគោរពអនុវត្តច្បាប់ស្តីពីចរាចរណ៍ផ្លូវគោក ក៏ដូចជាអនុវត្តតាមសេចក្តីអំពាវនាវនេះ ដើម្បីសុវត្ថិភាព សណ្តាប់ធ្នាប់ និងភាពសុខដុម ក្នុងសង្គម ជួបជុំសប្បាយរីករាយក្នុងក្រុមគ្រួសារ និងការអភិវឌ្ឍប្រកបដោយចិរភាព នៅទូទាំងព្រះរាជាណាចក្រកម្ពុជា៕
ប្រភព៖ កោះសន្តិភាព