ភ្នំពេញ៖ ការប្រកួតពានរង្វាន់សម្ដេច ហ៊ុន សែន ថ្នាក់ជាតិលើកទី១៣ ឆ្នាំ២០១៩នេះបានរកឃើញជើងឯកហើយ បន្ទាប់ពីការប្រកួតវគ្គផ្ដាច់ព្រ័ត្រកាលពីល្ងាចម្សិលមិញ ក្លិបបាល់ទាត់បឹងកេត បានប្រកួតឈ្នះក្លិបបាល់ទាត់ព្រះខ័នរាជស្វាយរៀង តាមរយៈការទាត់បាល់កាត់សេចក្ដី ១១ម៉ែត្រក្នុងលទ្ធផល ៥ទល់នឹង៤ បន្ទាប់ពីបញ្ចប់៩០នាទី និងម៉ោងបន្ថែម១៥នាទីពីរដង ក្រុមទាំងពីរបានត្រឹមស្មើគ្នា ១-១។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រោមក្រសែភ្នែកអ្នកគាំទ្រចូលរួមទស្សនាផ្ទាល់ ៦,១៥០នាក់នៅកីឡដ្ឋាន Smart RSN បឹងកេត ជាអ្នកបើកការនាំមុនមុនទៅលើព្រះខ័នស្វាយរៀង ដោយការតែតបាល់បញ្ជូលទីយ៉ាងល្អរបស់ខ្សែប្រយុទ្ធវ័យក្មេង ម៉ុន វ៉ាន់ដា បន្ទាប់ពីការលើកបាល់ចូលប្រអប់គ្រោះថ្នាក់របស់កីឡាករ ជា វេស្លី។
យ៉ាងណាមិញ នៅនាទី៧០ ក្លិបមានមូលដ្ឋាននៅខេត្តស្វាយរៀងបានវាយបកតាមស្មើវិញតាមរយៈការទាត់បាល់ពិន័យ ១១ម៉ែត្រដែលធ្វើបានសម្រេចដោយកីឡាករ ណុប តុលា បន្ទាប់ពីកីឡាកររបស់បឹងកេត សេត រ៉ស៊ីប បង្កឲ្យមានកំហុសក្នុងតំបន់គ្រោះថ្នាក់ និងទទួលបានកាតក្រហម។
ចប់ការប្រកួត ៩០នាទីក្រុមទាំងពីរស្មើគ្នា ១ទល់នឹង១ និងឈានដល់វគ្គបន្ថែមម៉ោង ១៥នាទីពីរដង។ ជាលទ្ធផលបញ្ចប់ ១៥នាទីពីរដង ពោលគឺពេញ ១២០នាទី ក្រុមទាំងពីរនៅតែបន្តរក្សាលទ្ធផលស្មើគ្នា ដែលតម្រូវឲ្យឈានដល់ការទាត់បាល់កាត់សេចក្ដី ១១ម៉ែត្រ។
ឈានដល់វគ្គទាត់បាល់សេចក្ដី១១ម៉ែត្រ បឹងកេត ជាអ្នកយកឈ្នះដោយលទ្ធផល ៥ទល់នឹង៤ និងបានគ្រងជើងឯកពានរង្វាន់សម្ដេចហ៊ុន សែនលើកទី១៣ ឆ្នាំ២០១៩ បន្ទាប់ពីកីឡាកររបស់ព្រះខ័នរាជស្វាយរៀងពីររូបស៊ុតមិនចូលគឺកីឡាករ សុក សំណាង និង ហូយ ផល្លីន។
គួរឲ្យដឹងដែរថា នេះជាឆ្នាំដំបូងហើយដែលក្លិបបឹងកេតឡើងដល់វគ្គផ្ដាច់ព្រ័ត្រពានរង្វាន់សម្ដេច ហ៊ុន សែន ហើយការឈ្នះពាននៅឆ្នាំនេះក៏ជាពានលើកដំបូងក្នុងប្រវត្តិសាស្រ្តរបស់ក្លិបផងដែរ៕
ចង់ឃើញថា ការប្រកួតវគ្គផ្ដាច់ព្រ័ត្ររវាង បឹងកេត និង ព្រះខ័នស្វាយរៀង ល្អមើលយ៉ាងណានោះ ទៅទស្សនាវីដេអូខាងក្រោមទាំងអស់គ្នា៖