ក្រុមហ៊ុនថែទាំសុខភាពចល័ត ម៉ាច់ និងសាកលវិទ្យាល័យពុទ្ធិសាស្រ្ត ចុះ MoU បណ្តុះបណ្តាលបន្តជំនាញគិលានុបដ្ឋាក!

ភ្នំពេញ៖ ក្រុមហ៊ុនថែទាំសុខភាពចល័ត ម៉ាច់ (MUCH Mobile Health Care) ហៅកាត់ថា MUCH បានចុះអនុស្សរណៈយោគយល់គ្នា (MoU) ជាមួយសាកលវិទ្យាល័យពុទ្ធិសាស្រ្ត ស្តីពី៖ «កម្មវិធីបណ្តុះបណ្តាលជំនាញគិលានុបដ្ឋាកការគ្រប់គ្រងថែទាំអ្នកជំងឺ» ដល់បុគ្គលិកជំនាញគិលានុបដ្ឋាកនៅតាមស្ថាប័នរដ្ឋ និងឯកជន និងនិស្សិតដែលទើបបានបញ្ចប់ការសិក្សាជំនាញគិលានុបដ្ឋាកនៅតាមសាកលវិទ្យាល័យនៅកម្ពុជា។ វគ្គបណ្តុះបណ្តាលបន្តនេះនឹងផ្តល់នូវជំនាញគិលានុបដ្ឋាកស្តង់ដារមួយ ដើម្បីឲ្យសិក្ខាកាមមានជំនាញច្បាស់លាស់ដែលអាចទៅធ្វើការនៅស្ថាប័ននានា ទាំងក្នុងស្រុក និងក្រៅប្រទេសប្រកបដោយទំនុកចិត្ត។

លោក ប៉ិច សុភា ប្រធានចាត់ការទូទៅនៃក្រុមហ៊ុនថែទាំសុខភាពចល័ត ហៅកាត់ថា (MUCH) បានថ្លែងថា អនុស្សរណៈយោគយល់គ្នារវាងក្រុមហ៊ុនថែទាំសុខភាពចល័ត ម៉ាច់ និងសាកលវិទ្យាល័យពុទ្ធិសាស្រ្តនេះ ត្រូវបានបង្កើតឡើងដើម្បីផ្តល់ចំណេះដឹង និងជំនាញពិតប្រាកដដល់សិក្ខាកាម ដើម្បីឆ្លើយតបតាមតម្រូវការបច្ចុប្បន្ន និង​ពេលអនាគត។ វគ្គបណ្តុះបណ្តាលបន្តនេះ ក៏មានគោដៅធ្វើបច្ចុប្បន្នភាព ចំណេះដឹង ជំនាញថ្មីៗដល់គិលានុបដ្ឋាក ស្របទៅតាមលក្ខខណ្ឌតម្រូវនៃច្បាប់របស់ប្រទេសយើង ក៏ដូចជាក្នុងតំបន់។

លោកបញ្ជាក់យ៉ាងដូច្នេះថា៖

អនុលោមតាមច្បាប់ស្តីពី ការគ្រប់គ្រងអ្នកប្រកបវិជ្ជាជីវៈវិស័យសុខាភិបាល គណៈគិលានុបដ្ឋាក មានតួនាទី ជានិយតករក្នុងការបង្កើតលក្ខខណ្ឌតម្រូវនានា សម្រាប់អ្នកវិជ្ជាជីវៈ និងអ្នកប្រកបវិជ្ជាជីវៈ សុខាភិបាលក្នុងការផ្តល់សេវាប្រកបដោយសុវត្ថិភាព ។​

តួនាទីទាំងនេះរួមមាន៖

• ចុះបញ្ជិកាអ្នកវិជ្ជាជីវៈសុខាភិបាលទាំងអស់
• ចេញអាជ្ញាបណ្ណប្រកបវិជ្ជាជីវៈរយៈពេល៣ឆ្នាំ ចំពោះអ្នកវិជ្ជាជីវៈសុខាភិបាលទាំងឡាយណា ដែលបានចុះបញ្ជិការួចហើយ
• ធានាថាអ្នកប្រកបវិជ្ជាជីវៈសុខាភិបាលដែលបានចុះបញ្ជិកា និងមានអាជ្ញាបណ្ណប្រកបវិជ្ជាជីវៈទាំងអស់ បំពេញតាមលក្ខខណ្ឌតម្រូវអប្បបរមា ដើម្បីបន្តអាជ្ញាបណ្ណប្រកបវិជ្ជាជីវៈរបស់ខ្លួនយ៉ាងទៀងទាត់តម្រូវឱ្យមានការអភិវឌ្ឍវិជ្ជាជីវៈបន្ត (បណ្តុះបណ្តាលជំនាញបន្ត)។
• គ្រប់គ្រងការប្រកបវិជ្ជាជីវៈរបស់អ្នកវិជ្ជាជីវៈសុខាភិបាល និងអ្នកប្រកបវិជ្ជាជីវៈសុខាភិបាលតាមរយៈ ការបង្កើតក្រម សេចក្តីសម្រេច និយាម គោលការណ៍ណែនាំ និងបទដ្ឋាននានា របស់ គណៈគិលានុបដ្ឋាកសម្រាប់ការប្រកបវិជ្ជាជីវៈសុខាភិបាល។

លោក ប៉ិច សុភា បានអះអាងថា បច្ចុប្បន្ននិស្សិតចុះឈ្មោះចូលរៀនជំនាញគិលានុបដ្ឋាកនៅកម្ពុជាមានចំនួនតិច ខណៈតម្រូវការនៃវិជ្ជាជីវៈនេះ កំពុងមានតម្រូវការច្រើន។ បើតាមអ្នកជំនាញរូបនេះ បន្ទាប់ពីក្រុមហ៊ុនថែទាំសុខភាពចល័ត ម៉ាច់​ ដំណើរការមានអតិថិជនគាំទ្រច្រើន ប៉ុន្តែខ្វះគិលានុបដ្ឋាកដែលមានជំនាញច្បាស់លាស់ ដែលអាចធ្វើការជាមួយអតិថិជនបាន។ លោកបានរៀបរាប់ថា ការងារជាគិលានុបដ្ឋាកជាការងារដ៏មានសារៈសំខាន់ ព្រោះគាត់នៅថែទាំអ្នកជំងឺច្រើនជាងវេជ្ជបណ្ឌិតទៅទៀត។ ហេតុនេះទើបក្រុមហ៊ុនបានសហការជាមួយសាកលវិទ្យាល័យពុទ្ធិសាស្រ្ត បង្កើតវគ្គបណ្តុះបណ្តាលនេះ ដើម្បីបំផុសឲ្យនិស្សិតស្រឡាញ់ការងារនេះ និងចាប់អារម្មណ៍ចូលរៀនជំនាញនេះឲ្យបានកាន់តែច្រើន ដើម្បីឆ្លើយតបនឹងតម្រូវការទីផ្សារដែលកំពុងខ្វះខាត។

លោកបញ្ជាក់យ៉ាងដូច្នេះថា៖ ​

បើតាមលោក ប៉ិច សុភា MoU នេះ នឹងបង្កើតឲ្យមានវគ្គបណ្តុះបណ្តាលជាច្រើនវគ្គ ដោយក្នុងមួយវគ្គមានរយៈពេល៦ខែ ដោយធ្វើនៅចុងសប្តាហ៍។ នៅពេលសិក្ខាកាមបញ្ចប់ការសិក្សា ពួកគេនឹងមានសមត្ថភាពពេញលេញ ដែលអាចចូលមកធ្វើការជាមួយក្រុមហ៊ុនថែទាំសុខភាពចល័ត ម៉ាច់ ឬដៃគូរបស់ក្រុមហ៊ុនទាំងក្នុងស្រុក និងក្រៅប្រទេស ឬក៏អាចទៅធ្វើការនៅស្ថាប័នផ្សេងៗទៀត។

លោក អ៊ុន សាន ប្រធានគណៈគិលានុបដ្ឋាកកម្ពុជាបានថ្លែងថា អនុស្សរណៈយោគយល់គ្នារវាងសាកលវិទ្យាល័យពុទ្ធិសាស្រ្ត និងក្រុមហ៊ុនថែទាំចល័ត ម៉ាច់ (MUCHs)នៅថ្ងៃនេះ បានបង្ហាញនូវឆន្ទៈនិងការប្តេជ្ញាចិត្តយ៉ាងមុតមាំរបស់គិលានុបដ្ឋាកក្នុងការចូលរួមចំណែកអភិវឌ្ឍជំនាញវិជ្ជាជីវៈសំដៅធ្វើឲ្យមានការរីកចម្រើននៅក្នុងសង្គមជាតិ តាមរយៈការចូលរួមដោះស្រាយបញ្ហាសុខភាពចម្បងៗដែលកំពុងប្រឈមមុខ ដូចជា៖ កំណើននៃជំងឺមិនឆ្លង ការបង្ករោគ  ជំងឺមនុស្សចាស់ជរា និងជាពិសេសបញ្ហាកង្វះកម្លាំងពលកម្មគិលានុបដ្ឋាកនៅពេលបច្ចុប្បន្ន ក៏ដូចជាពេលអនាគត នៅក្នុងប្រទេស តំបន់ និងទូទាំងពិភពលោក។

បើតាមលោក អ៊ុន សាន គិលានុបដ្ឋាក គឺជាកម្លាំងពលកម្មធំជាងគេ ដែលមានចំនួន ៦០% នៅក្នុងប្រព័ន្ធសុខាភិបាលនៃប្រទេសកម្ពុជាទាំងមូល។ គិលានុបដ្ឋាកក៏ជាកម្លាំងចលកររបស់ក្រសួងសុខាភិបាលដែលជាអ្នកជំរុញឲ្យមានប្រសិទ្ធភាព ប្រសិទ្ធផល ក្នុងការផ្តល់សេវាថែទាំប្រកបដោយគុណភាព និងលើកកម្ពស់សុខភាពអ្នកជំងឺ និងប្រជាពលរដ្ឋ។

លោកបញ្ជាក់យ៉ាងដូច្នេះថា៖

លោកបន្តថា ប្រព័ន្ធសុខាភិបាលពិភពលោកមិនអាចទទួលជោគជ័យបានឡើយ បើគ្មានគិលានុបដ្ឋាក និងបើគ្មានការចូលរួមយ៉ាងសកម្មរបស់ពួកគេក្នុងគ្រប់កម្រិតនៃប្រព័ន្ធសុខាភិបាល។ គិលានុបដ្ឋាកគឺជាអ្នកដែលបាននៅជាប់ជាមួយអតិថិជនក្នុងគ្រប់កំរិតនៃ គ្រឹះស្ថានថែទាំសុខភាព គ្រប់ស្រទាប់សង្គម។ គិលានុបដ្ឋាកពិតជាអ្នកដែលធ្វើឲ្យការកាត់បន្ថយតម្លៃសេវា និងលើកកម្ពស់គុណភាព នៃការថែទាំយ៉ាងពិតប្រាកដ។

សូមបញ្ជាក់ផងដែរថា ក្រុមហ៊ុនថែទាំសុខភាពចល័ត ហៅកាត់ថា MUCH បានបង្កើតឡើងបានជាង៣ឆ្នាំមកហើយ និងទទួលបានគាំទ្រពីអតិថិជនជាច្រើនទាំងជនជាតិខ្មែរ និងបរទេស។ លើសពីនេះអ្នកស្រី ឌី ផនភិរម្យ សហស្ថាបនិក MUCH ក៏បានក្លាយជាសហគ្រិន Startup មួយក្នុងចំណោមក្រុមហ៊ុន៣ ដែលទទួលបានជ័យលាភីសហគ្រិនវ័យក្មេងប្រចាំឆ្នាំ២០១៧ ផងដែរ។

ក្រុមហ៊ុនថែទាំសុខភាពចល័ត ម៉ាច់ (MUCH) ប្រជុំដោយគិលានុបដ្ឋាកប្រកបដោយជំនាញវិជ្ជាជីវៈច្បាស់លាស់ និងមានក្រមសីលធម៌ៈវិជ្ជាជីវៈខ្ពស់ មានផ្តល់ជូននូវសេវាកម្មដូចជា៖ ថែទាំចាស់ជរា អ្នកជំងឺរ៉ាំរ៉ៃ ថែទាំសម្រន់បំបាត់កាឈឺចាប់ ថែទាំអ្នកជំងឺដែលសម្រាកនៅមន្ទីរពេទ្យ ថែទាំក្រោយចេញពីមន្ទីរពេទ្យ ថែទាំមាតុភាពដល់គេហដ្ឋាន និងពិគ្រោះព្យាបាលជំងឺដោយវេជ្ជបណ្ឌិតជំនាញដល់គេហដ្ឋាន និងស្តារលទ្ធភាពពលកម្ម កាយសម្បទា និង ព្យាបាលដោយចលនា៕