តើអ្នកតែងតែដាច់លុយចុងខែ ឬជំពាក់គេមិនចេះចប់ដែរឬទេ? មួយក្នុងចំណោម ៦ ចំណុចខាងក្រោមនេះ គឺល្មមគ្រប់គ្រាន់បណ្ដាលឲ្យអ្នកធ្លាក់ខ្លួនក្រដោយមិនបានដឹងខ្លួន។ ប្រសិនជាអ្នកមានវាណាមួយ អ្នកគួរតែពិចារណាឡើងវិញមុនពេលដែលយឺតពេល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអ្នកគិតថាវាមិនទាន់ដល់ពេលដែលត្រូវសន្សំប្រាក់
បើសិនជាអ្នកយល់បែបនេះ វាពិតជាកំហុសមួយធ្ងន់ណាស់។ ពាក្យស្លោកអង់គ្លេសមួយបានពោលថា៖ «សន្សំមួយសេនស្មើនឹងរកបានមួយសេន»។ ពាក្យថា «សន្សំ» ពុំមែនជាគូនឹងពាក្យថា «លឿនពេក» នោះឡើយតែវានៅជាប់កៀកជាមួយនឹងពាក្យថា «យឺតជ្រុល»។ ចូលចាប់ផ្តើមសន្សំនៅថ្ងៃនេះ សម្រាប់ភាពជោគជ័យនៅថ្ងៃស្អែក មុននឹងពេលវេលាធ្វើឲ្យអ្នកស្តាយក្រោយ។
ចំណូលកាន់តែច្រើន ចាយកាន់តែច្រើន
ការបង្កើនចំណាយស្របពេលដែលអ្នកមានចំណូលកើនឡើងគឺជារឿងធម្មតាទេ។ ក៏ប៉ុន្តែ ប្រសិនជាអ្នកចេះតែអង្គុយនឹករករឿងសប្បាយទាមទារឲ្យអ្នកត្រូវចំណាយរាល់ពេលដែលប្រាក់ចំណូលរបស់អ្នកមានការកើនឡើង មិនយូរមិនឆាប់អ្នកគង់តែនឹងជួបបញ្ហាជាមិនខាន។ អ្នកត្រូវរៀនទប់អារម្មណ៍ និងរក្សាការចំណាយឲ្យនៅកម្រិតសមរម្យ បើមិនដូច្នោះទេ ទោះបីជាអ្នកខិតខំធ្វើការមួយជីវិតហើយមានចំណូលកើនឡើងយ៉ាងណា ក៏ពុំអាចមានប្រាក់សន្សំពិតប្រាកដបានដែរ។
គិតតែពីបច្ចុប្បន្នកាល ភ្លេចពីអនាគតកាល
ជីវិតរបស់មនុស្សយើងពុំមែនរស់សម្រាប់តែថ្ងៃនេះ ឬថ្ងៃស្អែកនោះទេ។ យ៉ាងណាមិញ ការចំណាយខ្ជះខ្ជាយទៅលើការសប្បាយនៅក្នុងជីវិតរស់នៅបច្ចុប្បន្ន គឺជាកត្តាចម្បងដែលជំរុញឲ្យអ្នកឈានទៅរកភាពក្រីក្រក្នុងពេលអនាគត។ អ្នកពុំអាចទាយទុកមុនថា នឹងមានរឿងអ្វីដែលនឹងកើតឡើងក្នុងថ្ងៃអនាគតបានឡើយ ដូច្នេះអ្នកគួរតែមានប្រាក់សន្សំសម្រាប់បម្រុងទុកនាគ្រាអាសន្ន។ ជាការពិតណាស់ អ្នកនឹងពុំអាចមានប្រាក់សន្សំនេះបានឡើយប្រសិនជាអ្នកចំណាយច្រើនពេកទៅលើជីវិតហ៊ឺហារបស់អ្នកនៅពេលឥលូវនេះ។
មិនបារម្ភពីបំណុល
បំណុល គឺជាឧបសគ្គដ៏ធំ និងគួរឲ្យរំខានជាងគេក្នុងការកសាងជីវភាពដ៏ល្អប្រសើរ។ ជាពិសេស បំណុលដែលមានការប្រាក់អាចនឹងលេបត្របាក់ប្រាក់ចំណូលរបស់អ្នកដោយមិនដឹងខ្លួន ជាហេតុធ្វើឲ្យអ្នកឈានទៅរកការភាពក្រីក្រ។ ដូច្នេះហើយ អ្នកត្រូវទុកបំណុលឲ្យនៅលើកំពូលនៅតារាងចំណាយ មានន័យថា អ្នកគួរតែគិតគូរសងប្រាក់ដែលជំពាក់គេឲ្យស្រេចបាច់ ឬ មួយប្រើប្រាស់ប្រាក់បំណុលនោះក្នុងការវិនិយោគឲ្យបានត្រឹមត្រូវ មុនពេលចំណាយលើអ្វីដែលមិនចាំបាច់ផ្សេងទៀត។
ប្រើជីវិតរស់នៅទាន់សម័យជ្រុល
ទូរស័ព្ទទំនើប ថេបប្លេត យានជំនិះថ្លៃៗ និងខោអាវទាន់សម័យអាចនឹងធ្វើឲ្យអ្នកមើលទៅ ហ៊ឺហា និងទាក់ទាញ ក៏ប៉ុន្តែវាក៏បានស្រូបទាញយកប្រាក់របស់អ្នកមិនតិចដែរ ។ អ្នកត្រូវដឹងថា ក្រុមហ៊ុននិមួយៗ មានរយៈពេលចន្លោះ ពីការចេញផលិតផលមួយ និងផលិតផលមួយទៀតមិនជាយូរណាស់ណាទេ។ ដូច្នេះហើយ ប្រសិនជាអ្នកដេញតាមផលិតផលទាំងនោះ ភាពក្រីក្រនឹងរត់មករកអ្នកយ៉ាងលឿន។ ចូរចង់ចាំថា អ្នកគួរតែប្រើប្រាស់របស់ចាស់ៗដែលអាចជំនួសរបស់ទាំងនោះបាន ហើយគួរទិញរបស់ទំនើបនៅពេលដែលចាំបាច់តែប៉ុណ្ណោះ។ សំខាន់បំផុត អ្នកមិនត្រូវអើពើនឹងការអួតអាង ឬ ពាក្យបញ្ចើចបញ្ចើរបស់មនុស្សនៅជុំវិញខ្លួននោះទេ។
មិនបានកត់ត្រាពីចំណូលចំណាយប្រចាំថ្ងៃ
ការមិនកត់ត្រាពីចំណូលប្រចាំថ្ងៃក៏អាចរួមចំណែកក្នុងការធ្វើឲ្យអ្នកក្រកាន់តែលឿន។ អ្នកគួរតែកត់ត្រានៅលើបញ្ជីមួយអំពីទិន្នន័យនៃចំណូលចំណាយប្រចាំថ្ងៃរបស់អ្នក ដើម្បីរំលឹកតុល្យភាពនូវការចំណាយរបស់ខ្លួនឯង។ នៅពេលខ្លះ អ្នកមិនមានបំណងចង់ចាយវាយច្រើននោះទេ ក៏ប៉ុន្តែការមិនបានកត់ត្រា អាចនឹងធ្វើឲ្យអ្នកចាយភ្លេចខ្លួន។ ជាងនេះទៅទៀតនោះ ការធ្វើបែបនេះអាចជួយអ្នករៀបចំផែនការថវិការ ដែលកំណត់ពីចំនួនទឹកប្រាក់ដែលអ្នកគួរចំណាយ និងគួរសន្សំទុកក្នុងរយៈពេលណាមួយ។