កូនក្មេងកាលណាយើងថែទាំបានដិតដល់ និងបំប៉នអាហាររូបត្ថម្ភបានត្រឹមត្រូវតាមក្បួនខ្នាត នោះច្បាស់ជាលូតលាស់បានល្អ រាងកាយមាំមួន ឯបញ្ញាស្មារតីក៏វាងវៃទៀត។ លោកវេជ្ជបណ្ឌិត អ៊ុន យូ បម្រើការងារនៅមន្ទីរពេទ្យកុមារជាតិ ផ្នែកខាងប្រដាប់រំលាយអាហារ នឹងរៀបរាប់លម្អិតអំពីអាហារូបត្ថម្ភដែលជាតម្រូវការចាំបាច់របស់កុមារ ដើម្បីជាចំណេះដឹងដល់ម៉ាក់ប៉ាដែលមានកូនតូចៗ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- អ្វីទៅជាអាហារូបត្ថម្ភ
ជាសារជាតិបំប៉នទាំងអស់ដែលមានតួនាទីសម្រាប់សាងសង់រាងកាយ ទាំងផ្នែកកាយសម្បទារ និងបញ្ញាស្មារតី។
២- ប្រភពសំខាន់ៗនៃអាហារូបត្ថម្ភ
អាហារូបត្ថម្ភ មានប្រភពផ្សេងគ្នា ហើយមុខងារ និងអត្ថប្រយោជន៍របស់វាក៏ខុសគ្នាទៅតាមនោះដែរ។ ទឹកដោះម្តាយជាប្រភពអាហារូបត្ថម្ភសំខាន់បំផុត ក្រៅពីនោះវាមានប្រភពមកពី៖
– សាច់ ស៊ុត៖ ជាប្រភពប្រូតេអ៊ីន និងជាតិដែក ផ្ដល់ឲ្យនូវការជួសជុល សាងសង់កោសិកា និងជាលិកាក្នុងរាងកាយ និងធ្វើឲ្យលូតលាស់បានល្អ។
– បន្លែ៖ បន្លែ ជាប្រភពវីតាមីន ជាតិរ៉ែ និងជាតិសរសៃល្អបំផុត ជួយសម្រួលការរំលាយអាហារ ការពារកុមារពីជំងឺផ្សេងៗ។
– ធញ្ញជាតិ៖ ជាប្រភពល្អបំផុតនៃជាតិប្រូតេអ៊ីន និងជាតិដែក ជួយដល់ការប្រឆាំងអុកសុីតកម្មក្នុងរាងកាយ និងជាប្រភពសម្បូរសារធាតុរ៉ែច្រើន ដែលជួយកាត់បន្ថយជំងឺទឹកនោមផ្អែម ជំងឺបេះដូង ជំងឺធាត់ និងជំងឺមហារីកមួយចំនួន។
– ផ្លែឈើ៖ ជាប្រភពវីតាមីន ដើម្បីពង្រឹងប្រព័ន្ធភាពស៊ាំ សម្រួលការលូតលាស់ និងជួយឲ្យកោសិកា ក៏ដូចជាសរីរាង្គដំណើរការបានល្អ។
៣- សារៈសំខាន់នៃអាហារូបត្ថម្ភចំពោះកុមារ
សារៈសំខាន់នៃអាហារូបត្ថម្ភចំពោះកុមារ គឺជួយសាងសង់រាងកាយឲ្យរីកធំធាត់ និងជួយបង្កើនការលូតលាស់ខួរក្បាល ធ្វើឲ្យក្មេងឆ្លាតវាងវៃ។អាហារូបត្ថម្ភមួយចំនួនជួយបង្កើនប្រព័ន្ធការពារក្នុងរាងកាយកុមារឲ្យរឹងមាំ មិនងាយឆ្លងជំងឺ។
៤- ផលប៉ះពាល់កង្វះអាហារូបតម្ភចំពោះកុមារ
– ស្គមរីងរៃ
– ហើម
– ខ្វះជាតិទឹក ស្បែកស្ងួតគ្មានសំណើម
– មិនលូតកម្ពស់
– ឈឺច្រើន
– ខួរក្បាលអត់វិវត្ត
– ខ្សោយបញ្ញាស្មារតី។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
Bong I.T