រន្ធត់ណាស់! កីឡាករ Andre Gomes បានរបួសបាក់ក.ជើងស្ដាំកាលពីយប់មិញនេះបន្ទាប់ពីត្រូវកីឡាករ Heung –Min Son ស្លាយកាត់យកបាល់ដោយអចេតនា (មានវីដេអូ)

អង់គ្លេស៖ ក្រុមស្ករគ្រាប់ Everton បានបើកទ្វារកីឡដ្ឋាន Goodison Park ទទួលស្វាគមន៍ក្រុមភ្ញៀវ Tottenham Hotspurs ក្នុងជំនួនប្រចាំក្របខណ្ឌ Premier League សប្ដាហ៍ទី១១ កាលពីរាត្រីថ្ងៃអាទិត្យកន្លងទៅនេះ ដោយការប្រកួតបញ្ចប់ទៅដោយក្រុមទាំងពីរទទួលលទ្ធផលស្មើគ្នា១ទល់នឹង១។

ក្រុមភ្ញៀវជាអ្នកស៊ុតនាំមុខដោយកីឡាករ Dele Alli តាមរយៈការបញ្ជូនបាល់ពីសំណាក់កីឡាករ Heung-Min Son នៅនាទីទី៦៣ ចំណែកឯ១គ្រាប់វាយកតាមស្មើរបស់ក្រុមម្ចាស់ផ្ទះធ្វើបានដោយកីឡាករ​ Cenk Tosun នៅនាទីទី៩០។

យ៉ាងណាមិញអ្វីដែលគួរអោយកត់សម្គាល់ក្នុងប្រកួតកាលពីយប់មិញនេះ គឺមានហេតុការណ៍ដ៏រន្ធត់មួយ ដោយខ្សែបម្រើក្រុម Everton កីឡាករ Andre Gomes បានរបួសបាក់ក.ជើងខាងស្ដាំភ្លាមៗ បន្ទាប់ពីត្រួវបានកីឡាករ Heung-Min Son ស្លាយកាត់យកបាល់ពីក្រោយរួចក៏បន្តដួលផ្ទប់ជាមួយនឹងខ្សែការពារស្លាបស្ដាំក្រុម Tottenham កីឡាករ Sergie Aurier នៅនាទីទី៧៩។

កីឡាករ Heung-Min Son បានឈរយំយ៉ាងខ្លាំងនិងមានភាពសោកស្ដាយយ៉ាងខ្លាំង បន្ទាប់ពីខ្លួនបានបង្កកំហុសដោយអចេតនាមួយនេះ។ កីឡាករ Andre Gomes ត្រូវបានផ្លាស់ប្ដូរចេញរួចបញ្ជូនទៅមន្ទីរពេទ្យភ្លាមៗ​ ចំណែកឯកីឡាករ Heung-Min Son ទទួលបានកាតក្រហមត្រូវបណ្ដេញចេញពីការប្រកួត៕

សូមទស្សនាវីដេអូខាងក្រោមនេះ៖