អីយ៉ាស!! ក្លិបធំៗចំនួន៣ ចាប់អារម្មណ៍មកលើកីឡាករម្នាក់របស់ Juventus

អឺរ៉ុប៖ ក្លិប Manchester United ត្រូវបានគេរាយការណ៍មកថាជាក្លិបមួយក្នុងចំណោមក្លិបធំ៣ ដែលចាប់អារម្មណ៍មកលើខ្សែបម្រើរបស់ Juventus កីឡាករ Emre Can។

ក្រោយមិនសូវមានឱកាសក្នុងការបង្ហាញសមត្ថភាពលើទីលានបន្ទាប់ពីការចូលដឹកនាំរបស់លោក Maurizio Sarri ខ្សែបម្រើជម្រើសជាតិអាល្លឺម៉ង់ Emre Can មានភាគរយខ្ពស់ចាកចេញពីក្លិបមានមូលដ្ឋាននៅទីក្រុង Turin នៅទីផ្សារដោះដូរកីឡាករខែមករាខាងមុខ។

ទាំងភាគីក្លិបបិសាចក្រហម និងសាម៉ីខ្លួនកីឡាករផ្ទាល់បានចាប់អារម្មណ៍ចំពោះលក្ខខណ្ឌរៀងៗខ្លួន ដែលនេះអាចជាសញ្ញាមួយដែលអតីតខ្សែបម្រើ Liverpool ត្រឡប់មកលេងនៅទឹកដីអង់គ្លេសក្នុងក្របខណ្ឌ Premier League សាជាថ្មី។

យ៉ាងណាមិញ បើតាមប្រភពពីក្នុងប្រទេសអ៊ីតាលីបានឲ្យដឹងថា នៅមានក្លិបធំ២ទៀតដែល Man UTD ត្រូវប្រជែងក្នុងការនាំយកខ្សែបម្រើវ័យ ២៥ឆ្នាំរូបនេះគឺក្លិបអ្នកមាននៅបារាំង Paris Saint-Germain និងក្លិបជើងឯកអាល្លឺម៉ង់ Bayern Munich។

គួរឲ្យដឹងដែរថា ក្រោយមិនមានឈ្មោះក្នុងបញ្ជីកីឡាករសម្រាប់លេងពានរង្វាន់ UEFA Champions League ខ្សែបម្រើ Emre Can ចូលលេងក្នុងក្របខណ្ឌ Serie A បានត្រឹម ១៥១នាទីប៉ុណ្ណោះក្នុងចំណោម ១១ប្រកួត៕

ប្រភព៖ SportsMole