អង់គ្លេស៖ ក្លិបកាំភ្លើងធំ Arsenal ត្រូវបានគេរាយការណ៍ថា បានចូលរួមប្រជែងជាមួយនឹងក្លិប Tottenham Hotspurs ក្នុងការដណ្ដើមយកខ្សែការពារស្លាបឆ្វេងរបស់ក្លិប Benfica កីឡាករ Alejandro Grimaldo។ ប៉ុន្តែពួកគេហាក់បីនៅមានគូប្រជែង១ទៀតដែលចង់បានកីឡាករវ័យ២៤ឆ្នាំរូបនេះផងដែរនោះគឺក្លិប Napoli។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករ Alejandro Grimaldo បានបង្ហាញទម្រង់លេងយ៉ាងលេចធ្លោក្នុងនាមជាខ្សែការពារស្លាបឆ្វេង ដោយក្នុងរដូវកាលថ្មីនេះ រូបគេស៊ុតបញ្ចូលទីបាន១គ្រាប់និងបញ្ជូនបាល់អោយមិត្តរួមក្រុមសម្រេចទីបានចំនួន៤ដង។
មិនត្រឹមតែប៉ុណ្ណោះ ខ្សែការពារស្លាបឆ្វេងសញ្ជាតិអេស្ប៉ាញរូបនេះ ក៏ជាចំណែកមួយដ៏សំខាន់ក្នុងការជួយអោយក្លិប Benfica លើកពានលីគកំពូល ព័រទុយហ្កាល់ Primeira Liga បានចំនួន២ដងផងដែរ ពោលគឺក្នុងរដូវកាល២០១៦/១៧ និង ២០១៨/១៩។
យោងតាមគេហទំព័រ A Bola របស់ប្រទេសព័រទុយហ្កាល់បានអោយដឹងថាក្លិបកាំភ្លើងធំ Arsenal និងក្លិប Tottenham Hotspurs កំពុងប្រជែងគ្នាក្នុងការចុះកុងត្រាយកកីឡាករវ័យ២៤ឆ្នាំនេះ នៅខែមករាខាងមុខ។
តាមរយៈប្រភពដដែលបានបន្តអោយដឹងទៀតថាខ្សែការពារស្លាបឆ្វេងរូបនេះត្រូវបានក្លិបដាក់អោយដេញថ្លៃក្នុងតម្លៃប្រមាណ៣៤លានផោន(ឬប្រហែល៤៤លានដុល្លារអាមេរិក)។
គួររម្លឹកផងដែរថា កីឡាករ Alejandro Grimaldo បានបណ្ដុះចេញពីថ្នាលយុវជនរបស់ក្លិប Barcelona ហើយបានផ្ទេរមកកាន់ក្រុម Benfica ក្នុងឆ្នាំ២០១៦ ជាមួយនឹងតម្លៃ២,១លានអឺរ៉ូ(ឬប្រហែល ២,៣លានដុល្លារអាមេរិក) ដោយបង្ហាញខ្លួនបានចំនួន១៣១ប្រកួត ស៊ុតបញ្ចូលទីបាន១១គ្រាប់និងបញ្ជូនបាល់អោយមិត្តរូមក្រុមបានចំនួន២៦ដង៕
ប្រភព៖ The Sun