ក្រៅពីទឹកដោះម្ដាយ ឬទឹកដោះគោ ចូលដល់វ័យដែលញ៉ាំអាហារ ម៉ាក់ប៉ាត្រូវតែចម្អិនចំណីចំណុកសម្រិតសម្រាំងទុកបំប៉នដល់កូន។ ប៉ុន្តែរបៀបចម្អិនចំណីអាហារដល់កូនអាចជារឿងងាយស្រួលជាងវិធីធ្វើយ៉ាងណាឲ្យកូនញ៉ាំអាហារទាំងនោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកវេជ្ជបណ្ឌិត អៀប តិចឆេង ឯកទេសកុមារ និងជំងឺផ្លូវដង្ហើម នៅមន្ទីរពេទ្យកុមារជាតិ បានឡើងធ្វើបទបង្ហាញក្នុងកម្មវិធី Vitabiotics-Education Meet 2019 ថា កូនតូចញ៉ាំអាហារមិនមែនជារឿងងាយឡើយ បើកូនមិនចង់ញ៉ាំត្រូវតែតាមលួងលោម និងធ្វើគ្រប់យ៉ាង ទម្រាំកូនព្រមញ៉ាំមួយម៉ាត់ៗ ហើយមិនត្រូវបោះបង់ចោល ព្រោះកូននឹងទទួលបានជីវជាតិគ្រប់គ្រាន់តាមរយៈអាហារ ដែលមានទឹកបាយ បន្លែ ត្រី សាច់ ស៊ុត និងបន្លែផ្សេងៗ។
វេជ្ជបណ្ឌិតឯកទេសកុមាររូបនេះ បានបន្តទៀតថា ម៉ាក់ប៉ាទាំងអស់ត្រូវដឹងថា កូនត្រូវការលួងលោម ហើយអាណាព្យាបាលត្រូវអត់ធ្មត់ខ្លាំងតាមបញ្ចុក និងធ្វើតាមគ្រប់យ៉ាងដែលកូនចង់បាន។ «យើងជាអាណាព្យាបាលត្រូវដឹងថា អ្នកនៅមើលកូនយើងមិនមែនគេមិនយកចិត្តទុកដាក់បញ្ចុកចំណីអាហារនោះទេ តែកូនខ្លះមិនព្រមញ៉ាំអាហារដោយងាយៗឡើយ កូនខ្លះទម្រាំព្រមញ៉ាំអ្នកបញ្ចុកឡើងដើមឈើក៏មាន អ្នកខ្លះត្រូវធ្វើភាពកំប្លុកកំប្លែង ច្រៀងរាំសព្វបែបគ្រប់យ៉ាង បានញ៉ាំមួយម៉ាត់ៗ»។
លោកវេជ្ជបណ្ឌិតក៏បានបន្ថែមទៀតថាដែរ មិនគួរឲ្យកូនពឹងផ្អែកតែលើទឹកដោះមួយមុខនោះឡើយ ព្រោះកូននឹងលូតលាស់មិនល្អ។ ចំពោះបញ្ហាកូនពិបាកញ៉ាំ យើងមិនគួរបណ្ដោយតាមដែរ តែត្រូវតាមចិត្តកូនថាចង់បានអ្វី ទើបព្រមញ៉ាំបាយ ហើយបើពេលខ្លះឃើញម៉ាក់ប៉ាឲ្យទូរស័ព្ទកូនមើល ត្រូវដឹងថាមិនមែនគាត់ចង់ទេ តែបើទ័លបានទើបព្រមញ៉ាំ។ បែបនេះហើយទើបត្រូវសុខចិត្តចាញ់ខ្លះទៅ តែកុំគ្រប់ពេលពេក។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet