ធម្មតា បើខ្វះជាតិទឹក ប៉ះពាល់សុខភាពយើង បើកើតមានអំឡុងពេលកំពុងពពោះទៀត ក៏អាចប៉ះពាល់ទាំងម៉ាក់ៗ និងគភ៌ក្នុងផ្ទៃ។ ដើម្បីអាចបង្ការខ្លួនកុំឲ្យខ្វះជាតិទឹកអំឡុងពេលពពោះ “Hello គ្រូពេទ្យ” នឹងលម្អិតបញ្ហានេះ ទាំងរោគសញ្ញា និងវិធីការពារ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១- រោគសញ្ញាខ្វះជាតិទឹកអំឡុងពពោះ
អំឡុងពេលពពោះ ស្រីៗមានបញ្ហាខ្វះជាតិទឹក នឹងមានចេញរោគសញ្ញាជាច្រើន ហើយរោគសញ្ញាប្រទះញឹកញាប់នោះ គឺកើនកម្ដៅក្នុងខ្លួន។ បើស្រីៗកំពុងពពោះ ញ៉ាំទឹកមិនគ្រប់នោះ នឹងធ្វើឲ្យរាងកាយឡើងកម្ដៅខ្លាំង ខណៈទឹកនោមពណ៌លឿងចាស់ ក៏ជាសញ្ញាព្រមានមួយផងដែរ។ នៅពេលទឹកនោមយើងមានសភាពថ្លាល្អ មានន័យថា យើងមានជាតិទឹកគ្រប់គ្រាន់ក្នុងខ្លួន ខណៈរោគសញ្ញាខ្វះជាតិទឹក ត្រូវគេបែងចែកជា ២ កម្រិតដួចជា៖
រោគសញ្ញាខ្វះជាតិទឹកកម្រិតស្រាល និងមធ្យម
– ស្ងួត និងស្អិតមាត់
– មានអារម្មណ៍ថាងងុយគេង
– ស្រេកទឹក
– នោមតិចជាងមុន
– ឈឺក្បាល
– ទល់លាមក
– មានអារម្មណ៍វិលមុខ។
បើមានរោគសញ្ញាទាំងនេះ ត្រូវញ៉ាំទឹក និងសម្រាកឲ្យបានច្រើនតាមតែអាចធ្វើបាន។ គួរទៅគ្រូពេទ្យ និងពន្យល់ពីអារម្មណ៍យើងកំពុងកើតមាន។ យ៉ាងណា យើងនៅតែអាចគ្រប់គ្រងអាការៈខ្វះជាតិទឹកតិចតួច និងមធ្យមបាន តាមរយៈការញ៉ាំទឹក ប៉ុន្តែលើការខ្សោះជាតិទឹកធ្ងន់ធ្ងរ ជាពិសេសលើស្រីៗកំពុងពពោះ ត្រូវប្រញាប់ទៅពេទ្យជាបន្ទាន់។
រោគសញ្ញាខ្វះជាតិទឹកធ្ងន់ធ្ងរ
– ស្រេកទឹកខ្លាំង
– មាត់ស្ងួត ស្បែកស្ងួត និងស្ងួតភ្នាសរំអិលខ្លាំង
– ឆាប់ខឹង និងមានការភាន់ច្រឡំ
– ទឹកនោមតិចតួច ឬគ្មានទឹកនោម
– ទឹកនោមមានពណ៌លឿងខ្លាំង
– ភ្នែករូងចូលក្នុង
– ចង្វាក់បេះដូង និងដង្ហើមលឿន
– មានសម្ពាធឈាមទាប។
ត្រូវសង្កេតមើលស្បែករបស់យើង ព្រោះពេលខ្សោះជាតិទឹក ស្បែកនឹងស្ងួត ហើយជ្រួញ ខ្វះភាពយឺត ឬនៅពេលស្បែកមានស្នាមផ្នត់ ហើយមិនអាចត្រលប់មកសភាពដើមវិញ ហើយបើមានរោគសញ្ញាទាំងនេះ ប្រញាប់ទៅជួបគ្រូពេទ្យជាបន្ទាន់។
២- វិធីការពារកុំឲ្យខ្វះជាតិទឹកអំឡុងពេលពពោះ
ត្រូវញ៉ាំទឹកឲ្យបានច្រើនជារៀងរាល់ថ្ងៃ។ ព្យាយាមញ៉ាំទឹកឲ្យបានយ៉ាងតិច ៨-១២ កែវរាល់ថ្ងៃ។ គួរញ៉ាំទឹកពេលកំពុងញ៉ាំអាហារ ដើម្បីជួយដល់ការរំលាយអាហារ។
បើមានអារម្មណ៍ចង់ក្អួតនៅពេលព្រឹក បណ្តាលមកពីការចាញ់កូន គួរញ៉ាំទឹកឲ្យបានច្រើននៅពេលចង្អោរ ដោយសារអាការៈចាញ់កូនខ្លាំងនៅពេលព្រឹក អាចបណ្តាលឲ្យអាហារមិនអាចធ្លាក់ចុះទៅក្នុងក្រពះ។ គួរប្រឹក្សាជាមួយគ្រូពេទ្យពីបញ្ហាយើងជួបប្រទះ។
មិនគួរញ៉ាំជាតិកាហ្វេអ៊ីន ដោយសារតែកាហ្វេអ៊ីន អាចធ្វើឲ្យនោមកាន់តែញឹក។ ទឹកជាជម្រើសដ៏ល្អជាងគេ ប៉ុន្តែយើងក៏អាចញ៉ាំទឹកដោះគោ ទឹកផ្លែឈើបានដូចគ្នា។
មនុស្សគ្រប់គ្នា សុទ្ធតែអាចមានបញ្ហាខ្វះជាតិទឹក ប៉ុន្តែចំពោះស្រីៗកំពុងពពោះ មានហានិភ័យខ្ពស់ជាងស្រីៗធម្មតា។ វិធីល្អបំផុតដើម្បីចៀសវាងខ្វះជាតិទឹក ត្រូវញ៉ាំទឹក បង្កើតទម្លាប់យកទឹកតាមខ្លួនពេលចេញ ឬទៅក្រៅផ្ទះ និងព្យាយាមតាមដានកម្រិតជាតិទឹកយើងបានញ៉ាំ។ ញ៉ាំទឹកក្នុងបរិមាណត្រឹមត្រូវ រាល់ថ្ងៃ ល្អទាំងសុខភាពម៉ាក់ៗ និងការលូតលាស់របស់កូនក្នុងផ្ទៃ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
Bong I.T