ចុម! ពីសុភាព​ ពេលនេះតួស្រីរឿង«Love O2O» ប្រែជាចេះលេងខ្លួនស៊ិចស៊ីបន្តិចម្តងៗហើយ!

ចិន៖ ប្រិយមិត្តយុវវ័យៗភាគច្រើន ដែលនិយមចូលចិត្តទស្សនាខ្សែភាពយន្តភាគចិន ប្រភេទបែបស្នេហារ៉ូមែនទិក ប្រាកដជាស្គាល់ហើយ នូវតួឯកស្រីកំពុងមានប្រជាប្រិយភាព នាង Zheng Shuang សម្តែងនៅក្នុងរឿង «Love O2O» ជាមួយតារាសម្តែងប្រុសរូបសង្ហា Yang Yang។

គួរឲ្យដឹងថា កន្លងមកអ្នកគាំទ្រតែងកត់សម្គាល់ឃើញថាតារាស្រី Zheng Shuang ភាគច្រើននិយមចូលចិត្ត តុបតែងខ្លួនបែបសុភាពសាមញ្ញៗ បង្ហាញពីសម្រស់ស្រស់ស្អាត បែបធម្មជាតិរបស់នាង ប៉ុន្តែក៏នៅតែឆក់បេះដូងអ្នកគាំទ្រឲ្យទាល់តែបាន ជាមួយនឹងភាពស្រស់ស្អាតទាំងក្រៅនិងក្នុងរបស់នាង ជាពិសេសគឺអត្តចរិកដ៏ល្អរបស់នាងតែម្តង។

ប៉ុន្តែមិនយ៉ាងណា ស្រាប់តែថ្មីៗនេះ តារាសម្តែងស្រីវ័យ២៨ឆ្នាំរូបនេះ ក៏បានធ្វើប្រិយមិត្តគាំទ្រមានការភ្ញាក់ផ្អើលមិនតិចនោះទេ ជាមួយនឹងការប្រែប្រួលនូវស្ទាយ៍តុបតែងខ្លួនរបស់នាង។

ជាការពិតណាស់ កាលពីថ្មីៗនេះ Zheng Shuang នាងបានថតម៉ូតសម្រាប់ទស្សនាវដ្តី Fashion មួយ ហើយអ្វីដែលគួរឲ្យចាប់អារម្មណ៍នោះ គឺការតុបតែងខ្លួនរបស់នាង គឺមានការផ្លាស់ប្តូរខុសពីសព្វមួយដង ដោយនាងបានតុបតែងមុខបែបពណ៌ភ្នែកក្រម៉ៅៗ បបូរមាត់ពណ៌ក្រហម ដែលធ្វើឲ្យនាងមើលទៅកាន់តែមានភាពស៊ិចស៊ី និងពោរពេញទៅដោយភាពជឿជាក់ និងរឹងមាំជាមុនឆ្ងាយណាស់។

មិនតែប៉ុណ្ណោះ សូម្បីតែស្ទាយ៍ស្លៀកពាក់របស់នាង ក៏ដូចជាស្ទាយ៍ថតម៉ូតរបស់នាង ក៏មើលទៅមានភាពប្លែកភ្នែក និងទាក់ទាញជាងមុនថែមទៀតផងដែរ៕