Barcelona សម្លឹងឃើញគោលដៅចម្បងដែល Man UTD អន្ទងតាមទិញ ដើម្បីមកជំនួសកីឡាករសំខាន់ខ្លួនម្នាក់

អេស្ប៉ាញ៖ Barcelona បានសម្លឹងឃើញកីឡាករវ័យក្មេងរបស់ Dinamo Zagreb ខ្សែប្រយុទ្ធស្លាប Dani Olmo ដើម្បីមកជំនួសកន្លែងរបស់ Osmane Dembele ខណៈយុវជនជម្រើសជាតិអេស្ប៉ាញរូបនេះក៏ជាគោលដៅរបស់លោក Ole Gunnar Solskjaer ផងដែរ។

Olmo គឺជាយុវជនថ្នាលរបស់ Barcelona និងជាកីឡាករមួយរូបក្នុងក្រុមជម្រើសជាតិអេស្ប៉ាញ U21 ដែលទើបតែឈ្នះពាន EURO U-21។ កាលពីរដូវក្ដៅកន្លងទៅ បិសាចក្រហម Manchester Untied បានដាក់សំណើ ៤០លានអឺរ៉ូដើម្បីទិញរូបគេ ប៉ុន្តែត្រូវបដិសេធដោយក្លិប Dinamo Zagreb។

កាលពីខែកញ្ញាកន្លងទៅ កីឡាករវ័យ ២១ឆ្នាំរូបនេះក៏បានប្រាប់ឲ្យដឹងថាគេចង់ចាកចេញពី Dinamo Zagreb ប៉ុន្តែខាងក្លិបនៅទាមទារតម្លៃខ្លួនខ្ពស់ចំពោះរូបគេ។

គួរឲ្យដឹងដែរថា Olmo ចូលលេងឲ្យ Dinamo Zagreb បាន៤៤ប្រកួតកាលពីរដូវកាលមុន ដោយអាចស៊ុតចូលទីបាន១២គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច៩ដង។ ខណៈរដូវកាលថ្មីនេះ គេរកបានគ្រាប់បាល់៥គ្រាប់ និងបញ្ជូនបាល់ឲ្យមិត្តរួមក្រុមសម្រេចទីបាន៥ដងហើយ ក្នុងចំណោមការបង្ហាញខ្លួន ១១ប្រកួត៕

ប្រភព៖ FoxSportsAsia