អ៊ីតាលី៖ ក្លិប AC Milan ត្រូវបានគេរាយការណ៍ថាបានយល់ព្រមលក្ខខណ្ឌផ្ទាល់ខ្លួនជាមួយនឹងខ្សែប្រយុទ្ធវ័យចំណាស់របស់ក្លិបសេះបង្កង់ Juventus កីឡាករ Mario Mandzukic ដោយនាំមុខក្លិប Manchester United ក្នុងការដណ្ដើមយកកីឡាកររូបនេះនៅខែមករាខាងមុខ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយោងតាមកាសែត Giornale ដែលមានប្រភពនៅប្រទេសអ៊ីតាលីបានអោយដឹងថាក្រុម AC Milan បានយល់ព្រមទៅលើលក្ខខណ្ឌផ្ទាល់ខ្លួនជាមួយនឹងកីឡាករ Mandzukic បើទោះបីជាខ្សែប្រយុទ្ធសញ្ចាតិក្រូអាតរូបនេះមានទំនាក់ទំនងខ្លាំងជាមួយនឹងក្រុម Manchester United ក៏ដោយ។
ខ្សែប្រយុទ្ធវ័យ៣៣ឆ្នាំរូបនេះមិនសូវមានឱកាសបានបង្ហាញខ្លួនអោយ Juventus ច្រើននោះទេក្នុងរដូវកាលនេះទេក្រោមការដឹកនាំរបស់គ្រូបង្វឹកសញ្ជាតិអ៊ីតាលីលោក Maurizio Sarri ដោយកន្លែងរបស់រូបគេត្រូវជំនួសដោយកីឡាករ Gonzalo Higuain។
យោងតាមរបាយការណ៍តាមរយៈប្រភពដដែលបានអោយដឹងថាក្លិប AC Milan បានទទួលការយល់ព្រមពីក្លិប Juventus រួចហើយសម្រាប់ការដាក់សំណើចរចាយកកីឡាករ Mandzukic នៅខែមករាខាងមុខ ដោយក្លិបដែលមានមូលដ្ឋាននៅទីក្រុងទូរីនមួយនេះមានបំណងចង់លក់ខ្សែប្រយុទ្ធសញ្ជាតិក្រូអាតរូបនេះទៅអោយក្លិប AC Milan ជាជាងលក់អោយ Inter Milan ។
គួរបញ្ជាក់ផងដែរថាកីឡាករ Mandzukic បង្ហាញខ្លួនអោយ Juventus បានចំនួន១៦២ប្រកួត ស៊ុតបញ្ចូលទីបាន៤៤គ្រាប់និងបញ្ជូនបាល់អោយមិត្តរួមក្រុមបញ្ចប់ទីបានចំនួន២៤ដង៕
ប្រភព៖ Teamtalk