ចិន៖ ប្រិយមិត្តអ្នកអានប្រាកដជាគិតថា ការអេះស្នាមមូសខាំគឺជារឿងធម្មតា ប៉ុន្ដែសម្រាប់បុរសជនជាតិចិនម្នាក់ ប៊ិះនឹងស្លាប់ ក្រោយពីអេះស្នាមមូសខាំនៅលើផ្ទៃមុខ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រភពបានឲ្យដឹងថា បុរសរូបនោះមានឈ្មោះថា ហ៊ូ អាយុ៦៧ឆ្នាំ ត្រូវបានមូសខាំត្រង់ថ្ពាល់ខណៈពេលកំពុងដេក នាថ្ងៃដំណើរកម្សាន្តក្នុងខេត្ត Hainan។ ក្រោយពីមានអារម្មណ៍ថាមូសខាំនិងរមាស់ គាត់បានដេកអេះពេញមួយយប់។ លុះពេលភ្ញាក់ពីដំណេក ផ្ទៃមុខនិងភ្នែកខាងឆ្វេងរបស់គាត់មានសភាពហើមបន្ដិច ប៉ុន្ដែគាត់មិនបានគិតអ្វីច្រើននោះទេ។
បីថ្ងៃបន្ទាប់ ផ្ទៃមុខរបស់គាត់ចាប់ផ្ដើមហើមខុសពីធម្មតា និងមានហៀរខ្ទុះចេញពីស្នាមមូសខាំទៀតផង។ គាត់ក៏ប្រញាប់ប្រញាល់ទៅមន្ទីរពេទ្យមួយកន្លែងក្នុងខេត្ត Hainan ប៉ុន្ដែគ្មានអ្វីប្រសើរឡើងទេ។ គាត់បានសម្រេចចិត្ត ធ្វើដំណើរត្រលប់មកទីក្រុង Shenyang វិញ ដើម្បីព្យាបាលក្នុងមន្ទីរពេទ្យជំនាញ។
ក្រោយពីពិនិត្យរួចមក វេជ្ជបណ្ឌិតបានឲ្យដឹងថា របួសនៅលើផ្ទៃមុខហើមរបស់លោក ហ៊ូ គឺមានប្រវែង៥សង់ទីម៉ែត្រ ដែលឆ្លងមេរោគពីការមូសខាំ។ ចំណែកស្បែកផ្ទៃមុខមានសភាពរលាកយ៉ាងខ្លាំងទៀតផង។ ប្រសិនបើមិនព្យាបាលទាន់ពេល មេរោគនោះនឹងអាចបង្ហឲ្យមានគ្រោះថ្នាក់ឈានដល់ការបាត់បង់ជីវិតបាន។
យ៉ាងណាមិញ មកទល់ពេលនេះ របួសរបស់លោក ហ៊ូ មានសភាពប្រសើរឡើងហើយ ក្រោយពីទទួលបានការព្យាបាលយ៉ាងល្អិតល្អន់។
ទន្ទឹមនឹងនេះ វេជ្ជបណ្ឌិតក៏បានដាស់តឿនផងដែរថា សម្រាប់អ្នកដែលត្រូវមូសខាំនៅលើផ្ទៃមុខ មិនគួរអេះវាទេ ព្រោះវាងាយនឹងឆ្លងមេរោគ។ ជាពិសេសពេលដែលអាកាសធាតុក្ដៅ ការអេះស្នាមមូសខាំនឹងរីកធំ ធ្វើឲ្យមេរោគដែលចេញពីញើសនិងធូលីចូលទៅក្នុងនោះ៕
សូមទស្សនារូបភាពខាងក្រោម៖