រាជធានីភ្នំពេញ ៖ ស្ត្រីរូបស្អាតម្នាក់បានកើតទុក្ខមិនសុខចិត្ត ខណៈគាត់បើករ៉ឺយែរថយន្តថយក្រោយក៏ប៉ះជាមួយម៉ូតូកង់បីចតស្ងៀមមួយគ្រឿង បណ្តាលឱ្យខូចខាតតិចតួច ហើយបានឈប់រថយន្តចេញទៅដោះស្រាយសងការខូចខាតទៅភាគីខាងម៉ូតូកង់បី បែរជាត្រូវជនឆ្លៀតឱកាសលួចយកលុយក្នុងរថយន្តទៅបាត់ ដែលហេតុការណ៍បង្កការភ្ញាក់ផ្អើល កាលពីវេលាម៉ោង១០យប់ថ្ងៃទី១៦ តុលា ស្ថិតនៅចំណុចមុខផ្សារសំណង់១២ ផ្លូវ១៨២ សង្កាត់ទឹកល្អក់៣ ខណ្ឌទួលគោក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សស្ត្រីខាងលើមិនត្រូវបានស្គាល់ឈ្មោះទេ ជិះរថយន្ដមួយគ្រឿងម៉ាក Mazada2 ពណ៌ក្រហម ពាក់ស្លាកលេខភ្នំពេញ2AW-1171 បានប្រាប់ថា នៅមុនកើតហេតុ គឺគាត់ទើបនឹងចេញពីញុំាអាហារជាមួយមិត្តភ័ក្ដិនៅហាងមួយកន្លែង មានទីតាំងនៅតាមបណ្តោយផ្លូវកម្ពុជាក្រោម ។ ពេលចេញមកវិញ គាត់ក៏បើករថយន្តទៅទិញទាខ្វៃនៅមុខក្លោងទ្វារផ្សារសំណង់12 ដើម្បីយកទៅញុំានៅផ្ទះ ។ ពេលមកដល់គេបិទតូបអស់ គាត់ក៏បើករថយន្តហួសទៅក្នុងដល់មុខផ្សារសំណង់12 គាត់ក៏ឈប់រថយន្ត ដើម្បីបត់ត្រលប់ក្រោយវិញបានរ៉ឺយែរថយន្តថយក្រោយបន្តិច ក៏ស្រាប់តែជ្រុលទៅប៉ះនឹងម៉ូតូកង់បីមួយគ្រឿងចតស្ងៀម បណ្តាលអោយខូចខាតតិចតួច ។
ចំណែករថយន្តក្រពិតមួយកំណាត់ក្រោយ តែមិនមានអ្នករងរបួសឡើយ ភ្លាមៗបន្ទាប់ពីបង្កហេតុគាត់ក៏បានចុចកញ្ចក់រថយន្តនឹងចុះមកសួរនាំ ព្រមទាំងទទួលខុសត្រូវពីកំហុសឆ្គង ហើយសងការខូចខាតទៅខាងភាគីម៉ូតូកង់បី តែខណៈពេលពេលកំពុងចរចាគ្នា ក៏មានប្រជាពលរដ្ឋនិងបក្សពួកក្រុមម៉ូតូកង់បីផ្សេងទៀតមកជួយនិយាយចរចា ធ្វើដូចជាជួយយកអាសាររូបគាត់ខ្លាំងណាស់ ។ ពេលកំពុងចរចាគ្នាជាមួយម៉ូតូកង់បី ដំបូងខាងម៉ូតូកង់បីទារសំណងចំនួន80ដុល្លារ តែចចារគ្នាត្រូវមកត្រឹមតែ50ដុល្លារ នាងក៏ព្រមសង នឹងបានដើរទៅបើកទ្វាររថយន្តយកលុយសង ។
ស្រាប់តែកាបូបលុយគាត់ត្រូវបានជនឆ្លៀតឱកាស បានបើកទ្វាររថយន្តគាត់លួចយកទៅបាត់ ដែលនៅក្នុងការបូបនោះមាន ប្រាក់ចំនួន200ដុល្លារ លុយខ្មែរមួយចំនួន ទូរស័ព្ទម៉ាកi phone 7 មួយគ្រឿង ចិញ្ចៀនមាសទម្ងន់៥ជី និងកាតធនាគារមួយសន្លឹក កាន់តែធ្វើឲ្យមានការផ្អើលឆោឡោថែមទៀត ។ បន្ទាប់ពីភ្ញាក់ផ្អើលថា គាត់បាត់កាបូបលុយ ក្រឡេកមកមើលអ្នកដែលមកជួយនាង និងក្រុមម៉ូតូកង់បីនោះបាននាំគ្នាជិះម៉ូតូចេញទៅបាត់អស់ទៅ ទើបផ្អើលដល់សមត្ថកិច្ចមូលដ្ឋានចុះអន្តរាគមន៍ភ្លាមៗផងដែរ។
បន្ទាប់ពីកើតហេតុ ស្ត្រីរងគ្រោះមិនបានទៅដាក់ពាក្យបណ្ដឹងនៅប៉ុស្តិ៍នគរបាលទេ គ្រាន់តែគាត់ហួសចិត្ត នឹងខ្លួនឯង ដែលចាញ់បោកអ្នកនៅជុំវិញខ្លួនគាត់ ដែលសំបូរទៅដោយមនុស្សពូកែសម្ដែងធ្វើដូចជា មានចិត្តមកជួយ ធ្វើអោយគាត់ទុកចិត្ត ភ្លេចខ្លួនតែមួយភ្លែត ក៏លួចយកអស់ និយាយចប់ស្ត្រីរងគ្រោះ អង្គុយនៅក្នុងរថយន្តមួយសន្ទុះធំ ក៏បានបើករថយន្តត្រលប់ទៅផ្ទះនៅអគារផ្សារទំនើបអូឡាំព្យាវិញបាត់ទៅ ៕
ប្រភព៖ កោះសន្តិភាព