អាការស្ពឹកស្រពន់ដៃ ស្រពន់ជើង ឈឺដូចក្តាមកៀប យើងអាចគិតថាជារឿងធម្មតា ព្រោះវាអាចបាត់ទៅវិញ ប៉ុន្តែបើអាការៈនេះ បើកើតឡើងច្រើនដងខុសប្រក្រតី ក៏ជាសញ្ញាពាក់ព័ន្ធជំងឺមួយចំនួន ទាមទារឲ្យយើងទាំងអស់គ្នាយកចិត្តទុកដាក់ តាមដានឲ្យបានល្អ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សផ្អែកតាមការស្រាវជ្រាវរបស់មូលនិធិគ្លីនិក Mayo មានមូលដ្ឋាននៅសហរដ្ឋអាមេរិក ឲ្យដឹងថា ស្ពឹកស្រពន់ដៃ ស្រពន់ជើង ជាធម្មតា គឺបណ្តាលមកពីការសង្កត់ ឬច្រត់លើ ឬការដាក់ជាសម្ពាធទៅលើផ្នែកណាមួយនៃសរសៃ ដៃ ឬកដៃ ដែលសរសៃទាំងនោះ ពាក់ព័ន្ធនឹងប្រព័ន្ធប្រសាទ។ យ៉ាងណាមិញ អាការៈនេះនឹងបាត់ទៅវិញ នៅពេលយើងរលាដៃ ហើយសម្ពាធបានបន្ថយវិញជារឿងធម្មតា។
ប៉ុន្តែអ្វីគួរកត់សម្គាល់វិញ នៅពេលអាការៈនេះឧស្សាហ៍កើតឡើងច្រើនដង យើងក៏គួរគប្បីមានការប្រុងប្រយ័ត្នផងដែរ។ បើផ្អែកតាម ការស្រាវជ្រាវពីប្រភពខាងលើដដែលឲ្យដឹងថា អាការៈស្ពឹកស្រពន់ដៃជើង អាចបណ្តាលមកពីមូលហេតុដូចជា៖
- រោគសញ្ញាជំងឺទឹកនោមផ្អែមដំណាក់កាលដំបូង ៣០%
- ប្រព័ន្ធប្រសាទណាមួយ មានការខូចខាតដោយសារការរបួស
- របួសដោយមានឆ្លងមេរោគ
- សារធាតុពុលក្នុងខ្លួនច្រើនលើសកម្រិត
- បញ្ហាក្រលៀន និងថ្លើម
- កង្វះជាតិវីតាមីន E B1 B6 B12 និងសារជាតិ Niacin ដែលសំខាន់សម្រាប់ចិញ្ចឹម និងរក្សាប្រព័ន្ធសរសៃប្រសាទជាតិអាល់កុលក្នុងខ្លួនច្រើនជាដើម។
យ៉ាងណាមិញការព្យាបាល និងបង្ការមានប្រសិទ្ធិភាពចំពោះជំងឺពាក់ព័ន្ធនឹងអាការៈខាងលើ អាចធ្វើបាននៅពេលយើងធ្វើរោគវិនិច្ឆ័យច្បាស់លាស់។ ការដឹងព័ត៌មានច្បាស់ពីដើមហេតុរបស់អាការៈជួយឲ្យយទទួលបានការព្យាបាល និងការណែនាំពីទម្លាប់រស់នៅល្អៗមួយចំនួន អាចបង្ការហានិភ័យនាពេលខាងមុខ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet