នោះៗ!! Atletico Madrid ដាក់គោលដៅចម្បង ក្នុងការនាំចូលខ្សែប្រយុទ្ធជួរមុខម្នាក់របស់ PSG

អេស្ប៉ាញ៖ Atletico Madrid ត្រូវបានរាយការណ៍មកថាបានដាក់គោលចម្បងក្នុងការនាំយកខ្សែប្រយុទ្ធរបស់ Paris Saint-Germain កីឡាករ Edinson Cavani។

ខ្សែប្រយុទ្ធវ័យ ៣២ឆ្នាំ ដែលចូលលេងឲ្យជើងឯកបារាំងបានចំនួន ២៩៣ប្រកួត រំពឹងថានឹងចាកចេញពី Paris Saint-Germain ដោយមិនមានតម្លៃខ្លួនស្របពេលដែលកិច្ចសន្យារវាងគេនិងក្លិបនឹងផុតសុពលភាពនៅខែមិថុនា ឆ្នាំ២០២០។

អ្នកចាត់ការទូទៅរបស់ At.Madrid លោក Diego Simeone បាននឹងកំពុងស្វែងរកខ្សែប្រយុទ្ធមកបន្ថែមក្នុងក្រុម ខណៈ ៨ប្រកួតកន្លងមកក្នុងរដូវកាលនេះ ក្រុមរបស់លោករកបានត្រឹមតែ ៧គ្រាប់ប៉ុណ្ណោះ បើទោះបីជាចំណាយលុយ ១១៣លានក្នុងការទិញយកខ្សែប្រយុទ្ធ Joao Felix ក៏ដោយ។

បើតាមប្រភពពីប្រទេសអេស្ប៉ាញលោក Simeone នឹងព្យាយាមទិញយក Cavani ក្នុងទីផ្សារខែមករាខាងមុខ ដើម្បីពង្រឹងបន្ថែមតំបន់ខាងលើរបស់ក្រុម។ យ៉ាងណាមានប្រភពពីក្នុងប្រទេសអង់គ្លេសថាបិសាចក្រហម Manchester United ក៏ចង់បានខ្សែប្រយុទ្ធជម្រើសជាតិអ៊ុយរ៉ាហ្គាយរូបនេះដូចគ្នា៕

ប្រភព៖ SportsMole