នារីម្នាក់ចំណាយប្រាក់វះកាត់ត្របកភ្នែកពីរជាន់ បែរជាឥឡូវដេកបិទភ្នែកលែងជិតទៅវិញ

ចិន៖ ជាទូទៅ ជនជាតិចិនគឺមិនមានត្របកភ្នែកពីរជាន់នោះទេ ដែលនាំឱ្យនារីជនជាតិមួយចំនួនគិតថាជាការបាត់បង់ភាពទាក់ទាញនៃសម្រស់។ ជាក់ស្ដែង នារីជនជាតិចិនម្នាក់ បានចំណាយប្រាក់អស់យ៉ាងច្រើនទៅលើការវះកាត់ត្របកភ្នែកពីរជាន់ ប៉ុន្ដែលទ្ធផលដែលនាងទទួលបាននោះគឺ មិនអាចបិទភ្នែកជិតទៅវិញ។

ប្រភពបានឲ្យដឹងថា នារីរូបនោះមានឈ្មោះថា Li បានចំណាយប្រាក់អស់ចំនួន១៣,០០០យ័ន (ប្រមាណ១,៨៤០ដុល្លារអាមេរិក) ទៅលើការវះកាត់ត្របកភ្នែកពីរជាន់ នៅគ្លីនិកកែសម្ផស្សមួយកន្លែងក្នុងទីក្រុង Hefei ប្រទេសចិន។ ក្រោយពីទទួលបានការវះកាត់រួចមក ភ្នែកទាំងសងខាងរបស់នាងបិទមិនជិត ទើបប្រញាប់ប្រញាល់សាកសួរយោបល់ពីគ្លីនិកនោះ តែវេជ្ជបណ្ឌិតបានប្រាប់នាងទៅវិញថា ស្ថានភាពនោះគឺមិនអីទេ វានឹងធម្មតាវិញក្រោយពីស្លាកស្នាមជាសះស្បើយ។

ប៉ុន្មានថ្ងៃកន្លងផុតទៅ ភ្នែករបស់នាងទាំងសងខាងចាប់ផ្ដើមព្រិល និងហើមយ៉ាងខ្លាំង ទើបនាងស្នើសុំឲ្យខាងគ្លីនិកវះកាត់ម្ដងទៀត។ សម្រាប់ការវះកាត់លើកទីពីររបស់នាងគឺមិនបានប្រសើរឡើងនោះទេ គឺផ្ទុយទៅវិញ ភ្នែករបស់នាងអាក្រក់លើសដើម និងមិនអាចបិទជិតដដែល។ ឃើញដូច្នេះ ខាងគ្លីនិកក៏បានផ្ដល់ជូនការវះកាត់លើកទីបីដោយមិនគិតប្រាក់ទៅដល់នាង ប៉ុន្ដែនាងមិនព្រមទទួលឡើយ។

យ៉ាងណាមិញ ក្រោយពីកើតមានរឿងរ៉ាវខាងលើនេះមក នាង Li បានទទួលសំណងពីខាងគ្លីនិកចំនួន ៣០,០០០យ័ន (ប្រមាណ ៤,២៤៧ដុល្លារអាមេរិក)។ ចំណែកភ្នែកទាំងសងខាងរបស់នាងគឺបិទមិនជិតដដែលនៅពេលដេកម្ដងៗ៕

សូមទស្សនារូបភាពខាងក្រោម៖