Manchester United ចាប់អារម្មណ៍ចង់បានកីឡាករឆ្នើមរូបនេះពី Real Madrid

អង់គ្លេស៖ ក្រុមបិសាចក្រហម Manchester United កំពុងចាប់អារម្មណ៍ចង់បានខ្សែបម្រើសញ្ជាតិអេស្ប៉ាញកីឡាករ Isco ពី Real Madrid ប្រសិនបើ Real Madrid ទិញបាន Christian Eriksen ពីក្រុម Tottenham Hotspur នៅខែមករាខាងមុខនេះ។

យោងតាមកាសែត The Mirror កាលពីពេលថ្មីៗនេះបានបញ្ជាក់អោយដឹងថាក្លិប Tottenham Hotspur មានបំណងលក់កីឡាករ Christian Eriksen ទៅកាន់ Real Madrid អំឡុងពេលទីផ្សារដោះដូរកីឡាករខែមករាខាងមុខនេះចៀសវាងកីឡាកររូបនេះចាកចេញដោយគ្មានតម្លៃខ្លួននៅរដូវកាលក្រោយដោយសារកុងត្រារបស់គាត់នឹងផុតកំណត់នៅរដូវកាលក្រោយនេះ។

តាមរយៈកាសែត Don Balon បានអោយដឹងថា Real Madrid ដាក់សំណើទិញ Eriksen ក្នុងតម្លៃ៣៥លានផោន(ឬ ៤៣,៧លានដុល្លារអាមេរិក) ដែល ​Man Utd សង្ឃឹមថាការចរចានេះនឹងជោគជ័យដើម្បីមានឱកាសយកកីឡាករ Isco។

តាមប្រភពដដែលបានអោយដឹងបន្តទៀតថា Isco បានប្រាប់អ្នកចាត់ការទូទៅលោក Zinedine Zidane ថាគាត់នឹងចាកចេញពីក្លិបប្រសិនបើពួកគេនាំ Eriksen មកកាន់ទឹកដី Madrid នៅខែមករាខាងមុខនេះ។

ទន្ទឹមនឹងនេះកាសែត Don Balon បានកត់សម្គាល់ថាក្លិបធំៗ២ដូចជា Man City និង Juventus ក៏ចូលរួមប្រជែងជាមួយ ​Manchester United ក្នុងការចុះកុងត្រាយកកីឡាករ Isco ពី Real Madrid ផងដែរប្រសិនបើ Eriksen ផ្ទេរទៅកាន់ Real Madrid នៅខែមករា។

គួរបញ្ជាក់ផងដែរថាក្លិប Manchester United កំពុងខ្វះកីឡាករដែលមានភាពប៉ិនប្រសប់ក្នុងការលេងតំបន់បម្រើដូច្នេះកីឡាករ Isco អាចជាកីឡាករសំខាន់ដែលអាចបំពេញចន្លោះក្នុងក្រុមរបស់លោក Ole Gunnar Solskjaer បាន៕

ប្រភព៖ Caughtoffside