កម្ពុជាមិនត្រូវការជនបរទេសបែបនេះទេ
ភ្នំពេញៈ មកទល់ថ្ងៃម្សិលមិញនេះមិនទាន់មានមន្ត្រីណាអាចអះអាងពីទីកន្លែងស្នាក់នៅរបស់ជនដែលល្បីខាងប្រព្រឹត្តអនាចារជាមួយកុមារអាឡិច សាន់ដឺ ត្រូហ្វីម៉ូវ បានទេ។ នគរបាលខេត្តព្រះសីហនុ បានថ្លែងថា ពួកគេបានបាត់ដានរបស់ជនម្នាក់នេះ មួយថ្ងៃបន្ទាប់ពីថ្ងៃបុណ្យណូអែល ហើយនគរបាលជាតិ បានថ្លែងថា ពួកគេមិនបានស្វែងរកជនម្នាក់នេះទេ ខណៈដែលនគរបាលព្រំដែនស្នើសុំរូបថត ហើយអ្នកនាំពាក្យស្ថាប័នរដ្ឋាភិបាលបានថ្លែងថា មិនបានដឹង។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ភ្នំពេញប៉ុស្តិ៍កាលពីម្សិលមិញថា លោកមិនបានដឹងថាតើជនជាតិរុស្ស៊ីដែលទើបដោះលែងម្នាក់នេះ ដែលប្រទេសរបស់គាត់ចង់ចាប់គាត់ពីបទឧក្រិដ្ឋកម្មផ្លូវភេទលើក្មេងស្រី៦នាក់អាយុ៩ឆ្នាំនិង១០ឆ្នាំ កំពុងរស់នៅក្នុងប្រទេសកម្ពុជា ឬចាកចេញពីប្រទេសកម្ពុជានោះទេ។
លោក ថ្លែងថា៖ «ខ្ញុំមិនប្រាកដអំពីកន្លែងរស់នៅ របស់ អាឡិច សាន់ដឺ ត្រូហ្វីម៉ូវ នោះទេ។ គាត់នៅក្នុងប្រទេសឬចាកចេញពីប្រទេស។ យើងបានស្រាវជ្រាវឈ្មោះ ត្រូហ្វីម៉ូវ [នៅលើកំណត់ត្រាអន្តោប្រវេសន៍] ប៉ុន្តែឈ្មោះនេះមិនមានទេ»។ លោកបន្តថា បុរសម្នាក់នេះ ដែលគេស្គាល់ថាមានឈ្មោះ Stanislav Molodyakov នៅក្នុងបញ្ជីឧក្រិដ្ឋជនត្រូវចាប់ខ្លួននៅក្នុងប្រទេសរុស្ស៊ីរបស់ប៉ូលិសអន្តរជាតិ ទំនងជាបានប្តូរឈ្មោះម្តងទៀត ហើយបានចាកចេញពីប្រទេស។ លោកបន្ថែមថា នេះគ្រាន់តែជាការគិតផ្ទាល់របស់លោកទេ។
អ្នកនាំពាក្យស្ថាប័នរដ្ឋាភិបាលដទៃៗទៀតបានថ្លែងថា ពួកគេពិតជាមិនបានដឹងទាំងស្រុងអំពីកន្លែងស្នាក់នៅរបស់ត្រូហ្វីម៉ូវទេ។
ស្នងការនគរបាលខេត្តព្រះសីហនុលោក តាក វណ្ណថាបានថ្លែងថា មន្ត្រីលោកមិនបានឃើញអតីតប្រធានក្រុមហ៊ុនវិនិយោគកោះពស់នេះ ចាប់តាំងពីថ្ងៃទី២៦ ធ្នូ ប៉ុន្តែថា ពួកគេកំពុងតែស្វែងរកកន្លែងគាត់ស្នាក់នៅពិតប្រាកដ។
«យើងភ័យខ្លាចថា គាត់ឆ្លងទៅវៀតណាម ដូច្នេះយើងពិនិត្យជាមួយនគរបាលនៅប៉ុស្តិ៍ព្រំដែនពីរគឺ បាវិត និងទៀងយ៉ាង»។ លោក តាក វណ្ណថា បានថ្លែងនៅវេលាម៉ោងប្រហែល៥ល្ងាចម្សិលមិញថា ៖ «យើងមិនទាន់ទទួលការឆ្លើយតបណាមួយ[ពីនគរបាលព្រំដែននៅឡើយទេ]»។
លោក តាក វណ្ណថា ទំនងជាមិនបានដឹងថា ក្រសួងមហាផ្ទៃបានពិនិត្យរួចហើយទេ។ ក្រសួងក៏បានស្នើសុំរូបថតថ្មីៗរបស់ ត្រូហ្វីម៉ូវ ដើម្បីបញ្ជូនទៅមន្ត្រីនគរបាលព្រំដែន ហើយបញ្ជាក់ថា មិនមានឈ្មោះទាំងពីររបស់ជននេះ ស្ថិតនៅក្នុងបញ្ជីចាកចេញពីប្រទេសនោះទេ។ នេះបើយោងតាមប្រភពដែលបានថ្លែងឲ្យដឹង។
លោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិ បានថ្លែងថា នគរបាលកំពុងតែស្វែងរកត្រូហ្វីម៉ូវ។ « ខ្ញុំមិនដឹងកន្លែងស្នាក់នៅរបស់ត្រូហ្វីម៉ូវទេ។ ត្រូហ្វីម៉ូវ មានសេរីភាពក្នុងការរស់នៅក្នុងប្រទេសកម្ពុជា ហើយគាត់ក៏គ្មានកាតព្វកិច្ចជូនដំណឹងនគរបាលដែរ។ បើទិដ្ឋាការគាត់នៅមានសុពលភាព គាត់មានសេរីភាព ក្នុងការរស់នៅកម្ពុជា»។
ទន្ទឹមនេះ មន្ត្រីស៊ើបអង្កេតរបស់អង្គការការពារកុមារ កំពុងបន្តតាមដានផ្ទះវីឡាមួយក្នុងខេត្តព្រះសីហនុ ជាកន្លែងដែលពួកគេសង្ស័យថា ត្រូហ្វីម៉ូវ កំពុងរស់នៅតាំងពីថ្ងៃសៅរ៍ បន្ទាប់ពីគេរាយការណ៍ពីសប្តាហ៍មុនថា គាត់បានរស់នៅក្នុងវីឡាមួយទៀតជិតសាលាបឋមសិក្សាក្រោយឆ្នេរសុខា។ វីឡាថ្មីនេះ គឺមានទីតាំងជិតផ្ទះសំណាក់មួយដែលជនអនាចារជាមួយកុមារ Alexander Wartin ជនជាតិអាល្លឺម៉ង់រស់នៅ តាំងពីរួចចេញពីពន្ធនាគារជាមួយ ត្រូហ្វីម៉ូវ កាលពីនៅថ្ងៃទី២០ខែធ្នូឆ្នាំ ២០១១។
បុរសទាំងពីរត្រូវបានដោះលែងដោយពន្ធនាគារខេត្តព្រះសីហនុ បន្ទាប់ពីទទួលបានការលើកលែងទោស ពីព្រះមហាក្សត្រខ្មែរ កាលពីថ្ងៃទី ២០ខែធ្នូឆ្នាំមុន៕
ដកស្រង់ចេញពី Phnom Penh Post
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]