ហ្វីលីពីន៖ ជាការពិតណាស់ រាល់ពេលមានដំណើរកម្សាន្តក្រៅប្រទេសម្ដងៗ មនុស្សម្នាក់ៗតែងតែរៀបចំសម្លៀកបំពាក់យ៉ាងច្រើន ចៀសវាងមិនគ្រប់គ្រាន់។ អ្វីដែលជាបញ្ហានោះគឺ ពេលដែលទៅដល់កន្លែងពិនិត្យទម្ងន់វ៉ាលី ប្រសិនបើលើសទម្ងន់ អីវ៉ាន់ដែលនៅក្នុងនោះនឹងត្រូវដកចេញខ្លះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាក់ស្ដែង ថ្មីៗកន្លងទៅនេះ នារីជនជាតិហ្វីលីពីនម្នាក់ បានលើសទម្ងន់វ៉ាលី បណ្ដាលឲ្យនាងត្រូវបង្ខំចិត្តយកខោអាវមកពាក់ជាច្រើនជាន់។
ប្រភពបានឲ្យដឹងថា នារីរូបនោះមានឈ្មោះថា Gel Rodriguez បម្រុងនឹងធ្វើការហោះហើរ នៅព្រលានយន្ដហោះមួយក្នុងប្រទេសហ្វីលីពីន។ លុះមកដល់កន្លែងពិនិត្យទម្ងន់វ៉ាលី បុគ្គលិកនៅទីនោះបានប្រាប់នាងថា វ៉ាលីរបស់នាងគឺលើសទម្ងន់។ សម្រាប់ទម្ងន់វ៉ាលីគឺអនុញ្ញាតបានត្រឹមតែ៧គីឡូក្រាមប៉ុណ្ណោះ ចំណែកវ៉ាលីរបស់នាងគឺមានទម្ងន់៩គីឡូក្រាម។
ដោយគ្មានដំណោះស្រាយ ភ្លាមៗនោះនាងបានទាញខោអាវចេញមកពាក់លើខ្លួនយ៉ាងច្រើនជាន់តាមដែលអាចធ្វើបាន ដូចជា ខោជើងវែងចំនួន៣ អាវយឺតចំនួន៩ អាវក្រៅដៃវែងចំនួនប្រមាណ៤ផងដែរ។
នាង Gel Rodriguez ក៏បានបញ្ជាក់ផងដែរថា ក្រោយពីធ្វើបែបនោះរួចមក វ៉ាលីរបស់នាងបានចុះនៅសល់ត្រឹមទម្ងន់៦,៥គីឡូក្រាមប៉ុណ្ណោះ។
យ៉ាងណាមិញ ក្រោយពីនាងបានបង្ហោះរូបភាពនៃការពាក់ខោអាវជាច្រើនជាន់ទៅលើបណ្ដាញសង្គមហ្វេសប៊ុករួចមក មានការចាប់អារម្មណ៍និងល្បីល្បាញយ៉ាងខ្លាំង។ ចំពោះការចែករំលែកមានរហូតទៅដល់១៧,០០០ដងទៀតផង៕