ទ្រង់ទ្រាយធំ! Spur ត្រៀមលក់កីឡាករ៥រូបនេះនៅខែមករាខាងមុខ

អង់គ្លេស៖ យោងតាមគេហទំព័រ The Times Report បានអោយដឹងថាក្លិប Tottenham Hotspur គ្រោងលក់កីឡាករ៥រូបចេញនៅខែមករាខាងមុខនេះរួមមានកីឡាករ Eric Dier, Christian Eriksen, Danny Rose, Serge Aurier និង Viktor Wanyama។

ក្លិបរបស់លោក Mauricio Pochettino មួយរយៈចុងក្រោយនេះបង្ហាញទម្រង់លេង​មិនបានល្អនោះទេ ដោយពីរប្រកួតចុងក្រោយ Spur របូតគ្រាប់បាល់រហូតដល់ទៅ១០គ្រាប់ឯណោះដោយចាញ់ Brighton ៣-០ និងចាញ់ Byern Munich ៧-២ ក្នុងព្រឹត្តិការណ៍ Champions League ដែលនេះជាមូលហេតុដែលលោក Pochettino ត្រូវរៀបចំក្រុមឡើងវិញដោយតម្រូវអោយលក់កីឡករមួយចំនួនចេញរួចទិញកីឡាករថ្មីៗចូល។

ខ្សែបម្រើកណ្ដាលកីឡាករ Eric Dier មិនសូវមានឱកាសក្នុងការលេងនោះទេដោយបង្ហាញខ្លួនបាន៣ដងប៉ុណ្ណោះអោយ Spur រដូវកាលនេះទេបន្ទាប់ពីតំណែងរបស់គេត្រូវបានដណ្ដើមដោយកីឡាករ Tanguy Ndombele ដូច្នេះវាជាពេលវេលាមួយដែលរូបគេត្រូវសម្រេចចិត្តចាកចេញ។

ចំណែកឯកីឡាករ Christian Eriksen មានក្លិបធំៗជាច្រើនដែលចាប់អារម្មណ៍ចង់បានរូបគេអំឡុងពេលទីផ្សារដោះដូរកីឡាករ ដោយកីឡាកររូបនេះអាចនឹងចាកចេញផងដែរស្របពេលដែលរូបគេមិនទាន់បានចុះកុងត្រាថ្មីនៅឡើយ។

ទន្ទឹមនឹងនេះនៅមានកីឡាករ៣រូបទៀតរួមមានកីឡាករ Danny Rose, Serge Aurier និង Victor Wanyama សុទ្ធតែស្ថិតនៅក្នុងបញ្ជីកីឡាករដែល Spur ត្រូវលក់ចេញនៅខែមករាខាងមុខនេះក្រោយមិនបានបង្ហាញទម្រង់លេងទាក់ចិត្តលោក Pochettino៕

ប្រភព៖ Dailymail