ខ្លាំងប៉ះខ្លាំងនៅអ៊ីតាលី! Juventus យកឈ្នះ Inter ក្រៅដីដណ្ដើម៣ពិន្ទុឈរកំពូលតារាង Serie A (មានវីដេអូ)

អ៊ីតាលី៖ កាលពីរាត្រីថ្ងៃអាទិត្យកន្លងទៅនេះមានការប្រកួតធំមួយប្រចាំលីគកំពូលអ៊ីតាលី Serie A ដែលជាការប្រកួតដណ្ដើមតំណែងកំពូលតារាងរវាងក្រុម Inter Milan នឹងក្រុមការពារជើងឯក Juventus ដោយការប្រកួតបញ្ចប់ទៅក្នុងលទ្ធផល១ទល់នឹង២។

ក្នុងការប្រកួតដ៏ជក់ចិត្តនេះគេសង្កេតឃើញថាក្រុមទាំងពីរមានការសម្រុកគ្នាទៅវិញទៅមក ដោយក្រុមម្ចាស់ផ្ទះ Inter Milan ស៊ុតបាន៦ជើងចំគោលដៅ៣ដងសម្រេចទីបាន១គ្រាប់ ចំណែកឯក្រុមភ្ញៀវ Juventus ស៊ុតបាន៩ជើងចំគោលដៅ៥ដងសម្រេចទីបាន២គ្រាប់។

១គ្រាប់របស់ក្រុមម្ចាស់ផ្ទះរកបានដោយកីឡាករ Lautaro Martinez តាមរយៈការស៊ុតបាល់ពិន័យ១១ម៉ែត្រនៅនាទីទី១៨ ចំណែកឯ២គ្រាប់របស់ក្រុមភ្ញៀវធ្វើបានដោយកីឡាករ ២រូបផ្សេងគ្នាដោយគ្រាប់ទី១ស៊ុតបញ្ចូលទីដោយខ្សែប្រយុទ្ធវ័យក្មេងសញ្ជាតិអាហ្សង់ទីនកីឡាករ Paulo Dybala នៅនាទីទី៤ និង គ្រាប់ទី២សម្រេចទីដោយកីឡាករ Gonzalo Higuain នៅនាទីទី៨០។

ដូច្នេះក្រោយលេងពេញ៩០នាទីក្រុមម្ចាស់ផ្ទះ Inter Milan រងបរាជ័យក្រោមថ្វីជើងក្រុមភ្ញៀវ Juventus ក្នុងលទ្ធផល១ទល់នឹង២។

គួរបញ្ជាក់ផងដែរថាជ័យជម្នះដ៏សំខាន់នេះជួយអោយ Juventus ទទួលបាន៣ពិន្ទុបន្ថែមឡើងឈរកំពូលតារាងដោយមានពិន្ទុសរុបចំនួន១៩ពិន្ទុ ខណៈក្រុមម្ចាស់ផ្ទះ Inter Milan មាន១៨ពិន្ទុឈរនៅចំណាត់ថ្នាក់លេខ២ ក្នុងសប្ដាហ៍ទី៧នេះ។

បើចង់ឃើញការស៊ុតបញ្ចូលទីគ្នារវាងក្រុមទាំងពីរអស្ចារ្យយ៉ាងណានោះ សូមទស្សនាវីដេអូខាងក្រោម៖