តាំងពីបែកគ្នានឹង March មក ទើបតែពេលនេះ Punpun ដាច់ចិត្តបង្ហាញមុខគូស្នេហ៍ថ្មី ក្នុងថ្ងៃទទួលសញ្ញាប័ត្របញ្ចប់ការសិក្សា

ថៃ៖ ដូចដែលប្រិយមិត្តធ្លាប់បានជ្រាបរួចហើយ ពីគូស្នេហ៍ដ៏គួរឲ្យស្រលាញ់មួយគូនេះ គឺតារាសម្ដែងស្រីវ័យក្មេង កញ្ញា Punpun និងតារាសម្ដែងប្រុស លោក March ហើយបើគិតមកទល់នឹងពេលនេះ ពួកគេទាំងពីរបានចែកផ្លូវគ្នាជាង៣ឆ្នាំមកហើយផងដែរ។

ដោយឡែក អ្វីដែលគូរឲ្យចាប់អារម្មណ៍នោះ គឺក្នុងថ្ងៃតារាសម្ដែងស្រី កញ្ញា Punpun ទទួលសញ្ញាប័ត្របញ្ចប់ការសិក្សា ក៏ស្រាប់តែវត្តមានគូស្នេហ៍ថ្មីរបស់តារាស្រីរូបនេះ បានបង្ហាញមុខជាសាធារណៈជាលើកដំបូង បន្ទាប់ពីទាក់ទងគ្នាស្ងាត់ៗមកជិត២ឆ្នាំហើយផងដែរ។

ជាមួយគ្នានេះដែរ តារាស្រី កញ្ញា Punpun ក៏បានទម្លាយឲ្យដឹងពីប្រវត្តិគូស្នហ៍ខ្លួនថា លោកគឺជាអ្នកប្រកបមុខជំនួញម្នាក់​ ដែលជាដៃគូសហការនឹងឪពុកនាង ហើយមិត្តប្រុសតារាស្រីរូបនេះ ក៏មានវ័យច្រើនជាងនាងដល់ទៅ១៤ឆ្នាំថែមទៀតផង។

ទន្ទឹមនឹងការបង្ហាញមុខគូស្នេហ៍ជាលើកដំបូងនេះ ក៏មានបណ្ដាអ្នកគាំទ្រជាច្រើនបានចូលទៅសម្ដែងការអបអរសាទរ និងជាពិសេសក៏បានចូលរួមត្រេកអរចំពោះការបញ្ចប់ការសិក្សារបស់តារាស្រីរូបនេះផងដែរ៕