រំជួលចិត្ត! ក្មេងៗនាំគ្នាប្រមូលប្រដាប់លេងរបស់ខ្លួនជាច្រើន ទុកជាកាដូទៅឲ្យមិត្តរួមថ្នាក់ម្នាក់ ដែលត្រូវភ្លើងឆេះផ្ទះ (មានវីដេអូ)

អាមេរិក៖ ថ្មីៗនេះ ក្មេងប្រុសម្នាក់ត្រូវបានបាត់បង់សម្ភារៈប្រើប្រាស់គ្រប់យ៉ាង ក្រោយពីភ្លើងឆេះផ្ទះ។ ឃើញដូច្នេះមិត្តរួមថ្នាក់បានប្រមូលយកប្រដាប់លេងរបស់ខ្លួន ទុកជាកាដូទៅដល់ក្មេងប្រុសនោះ។

ប្រភពបានឲ្យដឹងថា ក្មេងប្រុសឈ្មោះ Daniel Hunt រស់នៅក្នុងរដ្ឋ Tennessee បានបាត់បង់អ្វីៗគ្រប់យ៉ាងដោយសារភ្លើងឆេះផ្ទះរបស់គេ។ មិត្តរួមថ្នាក់បាននាំគ្នាប្រមូលប្រដាប់លេងរៀងៗខ្លួនមកសាលារៀន​ ដើម្បីលើកទឹកចិត្តនិងធ្វើឲ្យ Daniel ភ្ញាក់ផ្អើល។

អ្នកគ្រូប្រចាំថ្នាក់បានឲ្យដឹងថា ក្មេងៗទាំងអស់បានយកប្រដាប់លេងរបស់ខ្លួនទៅរៀបចំដាក់នៅលើតុ ដើម្បីរង់ចាំ Daniel ដើរចូលថ្នាក់រៀន។ លុះពេល Daniel បើកទ្វារ ស្ទើរតែមិនជឿនឹងភ្នែកខ្លួនឯង និងនិយាយថា «ខ្ញុំស្រលាញ់ទាំងអស់នេះណាស់» ចំណែកមិត្តរួមថ្នាក់បានរត់ទៅឱប Daniel គ្រប់ៗគ្នា។

ប្រភពបានបន្ដថា ក្រោយពីភ្លើងឆេះផ្ទះរួចមក  ក្រុមគ្រួសាររបស់ Daniel ត្រូវរើទៅនៅជាមួយសាច់ញាតិបណ្ដោះអាសន្ន។ ចំណែក  Daniel ត្រូវខកខានមិនបានមកសាលារៀនជាច្រើនថ្ងៃ ដែលធ្វើឲ្យមិត្តរួមថ្នាក់ទាំងអស់តែងតែរង់ចាំ Daniel ត្រលប់មករៀនវិញ និងមានមិត្តមួយចំនួនទៀតបានយំទៀតផង។ 

យ៉ាងណាមិញ វីដេអូឃ្លីបនៃសកម្មភាពនៅក្នុងថ្ងៃនោះត្រូវបានបង្ហោះទៅលើបណ្ដាញសង្គមដោយមានការចាប់អារម្មណ៍យ៉ាងខ្លាំង និងត្រូវបានមហាជនចាត់ទុកជាមិត្តភាពដ៏កម្របានឃើញផងដែរ៕

សូមទស្សនារូបភាពនិងវីដេអូខាងក្រោម៖