អ្នកណាយល់អារម្មណ៍នេះ? នាងរំភើបចិត្តដល់ស្រក់ទឹកភ្នែក ពេលគ្រូពេទ្យប្រាប់ថា ទីបំផុតនាងមានគត៌ហើយ ក្រោយការតស៊ូអស់ជាង ១៣ឆ្នាំ! (មានវីដេអូ)

ម៉ាឡេស៊ី៖ ស្រ្តីជនជាតិម៉ាឡេស៊ីម្នាក់ មកពីរដ្ឋ Johor បានបង្ហាញអារម្មណ៍រំភើបក្នុងចិត្តយ៉ាងខ្លាំង រហូតទប់ទឹកភ្នែកលែងជាប់ បន្ទាប់ពីត្រូវបានគ្រូពេទ្យប្រាប់ថា ទីបំផុតនាងមានគត៌ហើយ ក្រោយការតស៊ូអស់រយៈពេលជាច្រើនឆ្នាំមកនេះ។

បើតាមប្រភពបានឲ្យដឹងថា ស្រ្តីមិនត្រូវបានគេបង្ហាញអត្តសញ្ញាណនោះ បានព្យាយាមយកកូនជាយូរឆ្នាំមកហើយ ប៉ុន្តែជាលទ្ធផលនាងនឹងស្វាមីនៅតែបរាជ័យក្នុងការមានផ្ទៃពោះ ខណៈបើគិតមកទល់ពេលនេះអស់ពេល១៣ឆ្នាំមកហើយ ដែលធ្វើឲ្យនាងខូចចិត្ត និងអស់សង្ឃឹមជាខ្លាំង។

ប៉ុន្តែមិនថាយ៉ាងណា នារយៈពេលចុងក្រោយនេះ នាងក៏បានសម្រេចចិត្តទៅមន្ទីរពេទ្យ ដើម្បីទទួលបានការប្រឹក្សាយោបល់ ជាមួយនឹងគ្រូពេទ្យជំនាញខាងសម្ភព និងរោគស្រ្តី ក៏ដូចជាព្យាបាលទៅតាមវេជ្ជសាស្រ្តពេទ្យផ្សេងៗផងដែរ។

ប្រភពដដែលបន្តថា គ្រូពេទ្យបានចាប់ផ្តើមជួយព្យាបាលនាង ក្នុងរយៈពេលត្រឹម២៤ថ្ងៃប៉ុណ្ណោះ ហើយជាលទ្ធផលនៅទីបំផុតនោះ បានធ្វើឲ្យនាងភ្ញាក់ផ្អើលយ៉ាងខ្លាំង ជាមួយនឹងការធ្វើតេស្តបង្ហាញពីភាពវិជ្ជមាន ដែលមានន័យថា នាងមានទម្ងន់ ឬមានគត៌ហើយ។

ជាក់ស្ដែង ផ្អែកតាមរយៈគណនី Twitter មួយ ឈ្មោះ @yiyieeen ដែលបានបង្ហោះចែកចាយវីដេអូឃ្លីបក្នុងថ្ងៃដ៏រំភើបនោះ គឺបានបង្ហាញឲ្យឃើញ ពីប្រតិកម្ម ឬអារម្មណ៍ពិតរបស់ស្រ្តីខាងលើនេះ ដោយនាងបានរំភើបចិត្តជាពន់ពេក រហូតធ្វើឲ្យនាងអួលដើម.កស្រក់ទឹកភ្នែក បន្ទាប់ពីគ្រូពេទ្យបានបង្ហាញការធ្វើតេស្ត និងប្រាប់ថា នៅពេលនេះនាងមានទម្ងន់ហើយ។ ដូច្នេះនាងនឹងក្លាយជាម្តាយរបស់គេ ក្នុងពេលឆាប់ៗខាងមុខនេះ។

ជាមួយគ្នានោះ នាងក៏បានអរគុណដល់វេជ្ជបណ្ឌិត ដែលបានជួយឲ្យនាងទទួលបាននូវអព្ភូតហេតុ (ការមានផ្ទៃពោះ) ដ៏អស្ចារ្យមួយនេះ ដែលនាងមិនធ្លាប់ដែលគិតថា នាងនឹងអាចជួបប្រទះ ឬទទួលបានវាពីមុននោះឡើយ។

ជុំវិញនឹងរឿងរ៉ាវមួយនេះ មហាជន អ្នកលេងបណ្តាញជាច្រើន ក៏បានបញ្ចេញសារចូលរួមអបអរសាទរដល់នាង ចំពោះដំណឹងដ៏រីករាយនៃការមានបុត្រនេះផងដែរ៕

ចង់ជ្រាបច្បាស់ទស្សនាវីដេអូខាងក្រោម៖