រាជធានីភ្នំពេញ ៖ បុរសម្នាក់ជាសន្តិសុខយាមនៅខារ៉ាអូខេយីហោ «ចេ» បានរងរបួសបាក់ជើងខាងឆ្វេងយ៉ាងធ្ងន់ធ្ងរ ខណៈពេលជនរងគ្រោះកំពុងស៊ីញ៉ូរថយន្តមួយគ្រឿងរបស់មន្ត្រីសក្តិ៥ម្នាក់អោយចូលចំណត ពេលនោះទំនងជាអ្នកបើកបរខ្វះការប្រុងប្រយ័ត្នក៏ជាន់ហ្គាជ្រុលបុកជនរងគ្រោះខ្ទាតទៅប៉ះម៉ូតូមួយគ្រឿង រួចរថយន្តបង្កបន្តទៅបុករបងដែកផ្ទុបជញ្ជាំងហាងទៀត បណ្តាលឱ្យរងការខូចខាតម៉ូតូមួយគ្រឿង និងសម្ភារៈរបស់ហាងអស់មួយចំនួនផងដែរ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សករណីខាងលើនេះដែរបានកើតឡើងកាលពីវេលាម៉ោង៨និង១៥នាទីព្រឹកថ្ងៃទី២៣ ខែកញ្ញា ឆ្នាំ២០១៩ នៅចំណុចខាងមុខហាងខារ៉ាអូខេយីហោ «ចេ» តាមបណ្តោយផ្លូវលេខ៤៨៨ ក្នុងសង្កាត់ផ្សារដើមថ្កូវ ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា ជនរងគ្រោះឈ្មោះ ក្រេង ភាព ភេទប្រុស អាយុ៣៥ឆ្នាំ ជាសន្តិសុខយាមហាងខារ៉ាអខេខាងលើ មានស្រុកកំណើតនៅស្រុកស្អាង ខេត្តកណ្តាល បានរងរបួសបាក់ជើងខាងឆ្វេងយ៉ាងធ្ងន់ធ្ងរ ។ ចំណែករថយន្តបង្កម៉ាកប៉ាជឺរ៉ូស្ពត (PAJERO SPORT) ពណ៌ទឹកប្រាក់ ពាក់ស្លាកលេខ ភ្នំពេញ ២AA-៤០២៩ បើកបរដោយឈ្មោះ ប៉ាវ សូមុត ភេទប្រុស អាយុ៥២ឆ្នាំ ជាមន្ត្រីនគរបាលអន្តោប្រវេសន្តនៃក្រសួងមហាផ្ទៃ មានឋាន្តរសក្តិថ្នាក់វរសេនីយ៍ឯក (សក្តិ៥) ស្នាក់នៅផ្ទះលេខ ៧២ ផ្លូវលេខ១០៥ ក្នុងសង្កាត់បឹងត្របែក ខណ្ឌចំការមន ត្រូវសមត្ថកិច្ចឃាត់ខ្លួន។
តាមប្រភពដែលបានឱ្យដឹងបន្តថា មុនពេលកើតហេតុ គេឃើញបុរសម្នាក់ជាមន្ត្រីនគរបាលសក្តិ៥ ខាង លើបានបើករថយន្តមួយគ្រឿងចេញពីផ្ទះ ក្នុងគោលបំណងមកបង់ពន្ធនៅសាខាពន្ធដាខណ្ឌចំការមន ។ ពេលនោះមន្ត្រីនគរបាលសក្តិ៥ម្នាក់ខាងលើក៏បានបើករថយន្តចូលទៅចតនៅខាងមុខហាងខារ៉ាអូខេខាងលើ ដោយជនរងគ្រោះជាសន្តិសុខជាអ្នកស៊ីញ៉ូអោយរថយន្តចូលចំណតនៅខាងមុខហាង។
តាមប្រភពដដែលបានបន្តឱ្យដឹងថា ពេលនោះទំនងជាអ្នកបើកបរខ្វះការប្រុងប្រយ័ត្នក៏បានជាន់ហ្គាបន្ថែមជ្រុលទៅបុកជនរងគ្រោះជាសន្តិសុខម្នាក់នោះខ្ទាតប៉ះម៉ូតូមួយគ្រឿងម៉ាកវ៉េវ រួចរថយន្តបង្កបន្តទៅបុករបងដែកផ្ទុបជញ្ជាំងហាងខារ៉ាអូខេទៀត បណ្តាលអោយជនរងគ្រោះរងរបួសបាក់ជើងខាងឆ្វេងយ៉ាងធ្ងន់ធ្ងរតែម្តង ចំណែករថយន្តបង្ករងការខូចខាតក្រពឹតផ្នែកខាងមុខ និងផ្ទុះពោងចំនួន២ រីឯម៉ូតូមួយគ្រឿង និងសម្ភារមួយចំនួនរបស់ហាងខារ៉ាអូខេ ក៏រងការខូចខាតផងដែរ។
ក្រោយពេលកើតហេតុ បុរសជាសន្តិសុខដែលរងគ្រោះខាងលើត្រូវបានរថយន្តសាមុយរបស់មន្ទីរពេទ្យមិត្តភាពខ្មែរ-សូវៀតមកដឹកយកទៅសង្គ្រោះ ចំណែករថយន្តបង្ក និងមន្ត្រីនគរបាលសក្តិ៥ ជាអ្នកបើកបរ ក៏ត្រូវកម្លាំងសមត្ថកិច្ចបញ្ជូនទៅកាន់ការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះស្រាយគ្នាតាមច្បាប់ជាបន្តទៅទៀតផងដែរ៕
ប្រភព៖ កោះសន្តិភាព
Bong I.T