កូរ៉េខាងត្បូង៖ នាព្រឹកព្រលឹមថ្ងៃទី២៣ ខែកញ្ញា នេះ គេបានប្រទះឃើញ តារាចម្រៀងស្រី Sandara Park អតីតសមាជិកក្រុម 2NE1 នៅឯព្រលានយន្តយន្តហោះ Incheon ដែលនាងបានធ្វើដំណើរហោះឆ្ពោះទៅកាន់ទីក្រុងប៉ារីស ប្រទេសបារាំង ដើម្បីចូលរួមនៅក្នុងកម្មវិធីបង្ហាញម៉ូត Fashion Paris របស់ប៊្រេនល្បីឈ្មោះមួយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាក់ស្តែង ការបង្ហាញខ្លួនលើកនេះរបស់ Sandara បានធ្វើឲ្យមហាជនក៏ដូចជាក្រុមអ្នកសារព័ត៌មាន មានការភ្ញាក់ផ្អើលខ្លាំងជាងសព្វមួយដង ពោលគឺនាងបានផ្លាស់ប្តូរពណ៌សក់ថ្មី មកជាពណ៌លឿងដែលមើលទៅស្រស់ស្អាតប្លែកភ្នែកខ្លាំងមែនទែន។
ជាការពិតណាស់ កន្លងមកចាប់តាំងពីក្រុម 2NE1 បំបែកក្រុមមក គេតែងសង្កេតឃើញ តារាស្រីវ័យ៣៤ឆ្នាំរូបនេះ មិនសូវជាផ្លាស់ប្តូរឬលេងម៉ូតសក់ពណ៌ស្រស់ឆើតឆាយប៉ុន្មានឡើយ ដោយជាទូទៅនាងលេងម៉ូតសក់ពណ៌ខ្មៅ ឬពណ៌ធម្មជាតិតែប៉ុណ្ណោះ។
ដោយឡែកសម្រាប់លើកនេះ Sandara ក៏បានផ្លាស់ប្តូរពណ៌សក់មកជាស្រស់ឆើតឆាយជាថ្មីម្តងទៀត ដែលធ្វើឲ្យអ្នកគាំទ្រមានភាពនឹករឮក ដល់ស្ទាយ៍សក់ប្លែកៗរបស់នាងពីមុនជាខ្លាំង ហើយអ្នកគាំទ្រក៏សង្ឃឹមថា Sandara នឹងកាន់តែមានការងារសិល្បៈទោលច្រើនជាងមុន និងវិលត្រឡប់មកលេងខ្លួនជាមួយស្ទាយ៍ប្លែកៗជាថ្មីម្តងទៀតផងដែរ៕