អីយ៉ាស! កីឡាករឆ្នើមរបស់ Man City រូបនេះអាចនឹងទៅចូលរួមជាមួយក្លិប Inter Miami របស់ Beckham នៅរដូវក្ដៅខាងមុខនេះ

អង់គ្លេស៖ វីរបុរសរបស់ក្លិប Manchester City គឺកីឡាករ David Silva បានកំណត់ពេលវេលាដើម្បីលាគ្នាជាមួយក្លិបមេឃខៀវ ​Manchester City នារដូវក្តៅនេះ។

យោងតាមគេហទំព័រ Independent បានអោយដឹងថា Silva ទំនងជានឹងចាកចេញពី Man City ហើយធ្វើដំណើរទៅកាន់ Major League Soccer ដែលជាលីគកំពូលរបស់អាមេរិក ដើម្បីចុះកុងត្រាជាមួយក្លិប Inter Miami របស់លោក David Beckham នៅពេលដែលកិច្ចព្រមព្រៀងរបស់គាត់ជាមួយក្រុមជើងឯក Premier League មួយនេះនឹងត្រូវបញ្ចប់នៅរដូវកាលនេះ។

MLS (លីគកំពូលអាមេរិក) ជាកន្លែងដែលពោរពេញដោយកីឡាករដែលមានវ័យជ្រេរទៅលេងនៅទីនោះ មុនពេលដែលពួកគេចូលនិវត្តន៍ពីវិស័យបាល់ទាត់ ដូច្នេះវាសមហេតុផលហើយថាកីឡាករ Silva អាចសម្លឹងមើលឃើញការផ្លាស់ប្ដូរទៅលេងនៅទីនោះ។

គួររំលឹកផងដែរថាកីឡាករ David Silva បានមករួមជាមួយ Manchester City តាំងពីឆ្នាំ២០១០ មកម៉្លេះដោយផ្ទេរមកពីក្រុម Valencia។ កីឡាករវ័យ៣៣ឆ្នាំរូបនេះបានជួយអោយក្លិបឈ្នះពានរង្វាន់រួម​មានដូចជា ពាន FA Cup ចំនួន២ដង, ពាន Premier League ចំនួន៤ដង និង Community Shield ចំនួន២ដង៕

ប្រភព៖ 101greatgoals