ម៉ាឡេស៊ី៖ អ៊ុំស្រីវ័យចំណាស់ម្នាក់រស់នៅក្នុងទីក្រុង Penang បានតស៊ូលក់បាយមាន់ជារៀងរាល់ព្រឹក ដើម្បីរកប្រាក់ទៅចិញ្ចឹមឆ្កែនិងឆ្មាអនាថាចំនួន១០០ក្បាល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រភពបានឲ្យដឹងថា អ៊ុំស្រីមានឈ្មោះថា Huang Xiuying អាយុ៦៤ឆ្នាំ បានចាប់ផ្ដើមចិញ្ចឹមឆ្កែនិងឆ្មាអនាថា ក្រោយពីឆ្កែសំណព្វចិត្តមួយក្បាលរបស់គាត់ដែលងាប់បាត់ទៅដោយសារឡានបុក កាលពី២០ឆ្នាំមុន។
អ៊ុំស្រីបាននិយាយទាំងអួលដើម.កថា៖
«នៅពេលដែលបានឃើញឆ្កែអនាថា តែងតែរម្លឹកខ្ញុំទៅដល់ឆ្កែដែលបានស្លាប់ទៅរបស់ខ្ញុំជានិច្ច។ ដូច្នេះហើយ បានជាខ្ញុំតែងតែនាំឆ្កែឬឆ្មាអនាថាទាំងនោះមកនៅជាមួយម្ដងមួយៗ។ មួយចំនួនខ្ញុំរើសពីតាមដងផ្លូវ ចំណែកមួយចំនួនទៀត មានអ្នកជិតខាងយកមកឲ្យ។»
ប្រភពបានបន្ដថា មានយប់ខ្លះ គាត់ថែមទាំងចំណាយរយៈពេល៤ម៉ោង ដើម្បីមើលថែសត្វទាំងនោះទៀតផង។ ចំពោះការចិញ្ចឹមសត្វចំនួន១០០ក្បាលគឺមិនងាយស្រួលនោះទេ គឺត្រូវចំណាយប្រាក់អស់ជាច្រើន។ ជារៀងរាល់ខែអ៊ុំស្រីចំណាយ ១,៥០០រីងហ្គីត (ប្រមាណ ៣៥៨ដុល្លារអាមេរិក) ទៅលើអ្នកជួយមើលថែសត្វ និង ៤៥០រីងហ្គីត (ប្រមាណ១០៨ដុល្លារអាមេរិក) ទៅលើថ្លៃជួលជម្រកសត្វ ។ មានថ្ងៃខ្លះប្រាក់ចំណូលបានមកពីការលក់បាយមាន់គឺតិចមែនទែន។
មានមនុស្សមួយចំនួនបានសួរទៅអ៊ុំស្រីថា៖
«តើមិនហត់នឿយក្នុងការចិញ្ចឹមសត្វអនាថាទេ ឬយ៉ាងម៉េច?»
អ៊ុំស្រីតបទៅវិញថា៖
«ការចិញ្ចឹមគឺមិនលំបាកទេសម្រាប់ខ្ញុំ ព្រោះខ្ញុំគិតថាវាជាការងារនៅផ្ទះ។ នៅពេលដែលខ្ញុំឃើញសត្វទាំងនោះបានស៊ីឆ្អែត និងដេកស្រួល ខ្ញុំពិតជាមានសេចក្ដីសុខណាស់។»
ក្រោយពីរឿងរ៉ាវរបស់អ៊ុំស្រីត្រូវបានលេចឮរួចមក មានមហាជនជាច្រើនកោតសរសើរពីគាត់ និងចាត់ទុកជាប្រជាជនដ៏គំរូមួយរូបទៀតផង៕
Bong I.T