Manchester United ព្យាយាមចុះហត្ថលេខាយកកីឡាករ James Maddison ខណៈ Leicester បង្ហើបពីតម្លៃ

អង់គ្លេស៖ ក្រុមបិសាចក្រហម Manchester United នឹងព្យាយាមចុះហត្ថលេខាជាមួយ James Maddison ។ យោងតាមសារព័ត៌មាន The Times ចេញនៅថ្ងៃច័ន្ទនេះបាននិយាយថាក្រុម Man United សង្ឃឹមថានឹងចុះកុងត្រាជាមួយកីឡាករ James Maddison ពី Leicester នៅខែមករាខាងមុខនេះ។

អ្នកចាត់ការទូទៅរបស់ក្រុមបិសាចក្រហមចង់កសាងក្រុមរបស់ខ្លួនឡើងវិញដោយប្រើប្រាស់កីឡាករអង់គ្លេសវ័យក្មេង មានចំណង់ក្នុងការលេង ដូច្នេះកីឡាករ Maddison ជាកីឡាករដែលត្រូវគ្រប់ចំណុចដែលលោក Sokjaer ចង់បាន។

James Maddison បានចូលរួមជាមួយ Leicester ដោយផ្ទេរពី Norwich City កាលពីខែមិថុនាឆ្នាំ ២០១៨ ក្នុងតម្លៃ២០លានផោន។

Maddison បានចុះហត្ថលេខាលើកិច្ចសន្យារយៈពេល ៥ ឆ្នាំដើម្បីលេងនៅឯកីឡដ្ឋាន King Power ហើយគាត់នៅសល់រយៈពេល៣ឆ្នាំកន្លះទៀតលើកិច្ចព្រមព្រៀងបច្ចុប្បន្ននេះ។

បិសាចក្រហមទំនងជាត្រូវចំណាយលើសចំនួនបីដងនៃចំនួនទឹកប្រាក់ដែល Leicester ទិញកីឡាករ Maddison ពីក្រុម Norwich មានន័យថា Manchester United ត្រូវចំណាយប្រហែល៦០លានផោន បើសិនជាចង់បានកីឡាករ Maddison៕