អឺរ៉ុប៖ គិតមកទល់ពេលនេះអ្នកចាត់ការទូទៅលោក Jose Mourinho នៅតែមិនទាន់ដឹកនាំក្លិបណាមួយនៅឡើយ ក្រោយចែកផ្លូវគ្នាជាមួយ Manchester United ជិតមួយឆ្នាំទៅហើយនោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យ៉ាងណាមិញ អតីតកីឡាករជួរមុខមួយរូបរបស់ Barcelona កីឡាករ Samuel Eto’o បានហៅអ្នកចាត់ការទូទៅសញ្ជាតិព័រទុយហ្គាល់រូបនេះឲ្យមកដឹកនាំក្លិបមានមូលដ្ឋាននៅតំបន់កាតាឡាន់ ដើម្បីជំនួសកន្លែងរបស់អ្នកចាត់ការទូទៅបច្ចុប្បន្នលោក Ernesto Valverde។
និយាយទាក់ទងនឹងអ្នកចាត់ការទូទៅរហស្សនាម Special One អតីតខ្សែប្រយុទ្ធដែលព្យួរស្បែកជើងចូលនិវត្តន៍ថ្មីៗ Eto’o លើកឡើងយ៉ាងដូច្នេះថា៖
“ខ្ញុំពិតជាហត់ក្នុងការនិយាយដដែលៗថាគាត់ (Mourinho) គឺមនុស្សម្នាក់ល្អបំផុតនៅក្នុងពិភពបាល់ទាត់។ ពេលដែលខ្ញុំប្រកាសចូលនិវត្តន៍ មនុស្សដំបូងដែលបានផ្ញើសារមកខ្ញុំគឺជាគាត់។”
អតីតមិត្តរួមក្រុមរបស់ Messi នៅ Barcelona រូបនេះបានបន្តទៀតថា៖
“ខ្ញុំចង់ឲ្យ Jose មកកាន់ Mallorca វាពិតជាល្អព្រោះទីនោះគឺជាក្រុងដែលប្រណីតមួយរបស់ប្រទេសអេស្ប៉ាញ។ ប៉ុន្តែខ្ញុំពិតជាចង់ឲ្យគាត់មកដឹកនាំ Barca ជាង។”
គួរឲ្យដឹងដែរថា Mourinho និង Eto’o ធ្លាប់បានចំណាយពេលវេលាធ្វើការជាមួយគ្នានៅ ២ក្លិបគឺ Inter Milan និង Chelsea៕
ប្រភព៖ FoxSportsAsia
Bong I.T