បរទេស៖ អតីតវីរបុរសរបស់ក្លិបបិសាចក្រហម Manchester United លោក David Beckham ចង់បានខ្សែប្រយុទ្ធរបស់ Barcelona កីឡាករ Lionel Messi ដើម្បីទៅលេងឲ្យក្លិបរបស់ខ្លួននៅសហរដ្ឋអាមេរិក Inter Miami។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្លិបរបស់ Beckham នឹងចូលលេងក្នុងក្របខណ្ឌ Major Soccer League (MLS) សម្រាប់រដូវកាល ២០២០ ដូច្នេះក្លិបមួយនេះកំពុងតែស្វែងរកកីឡាករល្អៗដើម្បីប្រកួតប្រជែងជាមួយក្លិបដទៃ។
យោងតាមប្រភពពី Barcelona Radio ខ្សែប្រយុទ្ធ Messi ត្រូវបានទាក់ទងក្នុងការផ្លាស់ទៅលេងនៅអាមេរិក ខណៈខ្សែប្រយុទ្ធជម្រើសជាតិអាហ្សង់ទីនរូបនេះអាចចាកចេញពីក្លិបមានមូលដ្ឋាននៅតំបន់កាតាឡាន់នៅដំណាច់រដូវកាល ២០១៩-២០២០ ដោយមិនមានតម្លៃខ្លួន បើសិនជាគេចង់ចាកចេញ។
Beckham ត្រូវបានគេមើលឃើញថាកំពុងតែនឹងដាក់ចិត្តចង់បានកីឡាករកំពូលៗទៅលេងនៅក្លិបរបស់ខ្លួន ជាក់ស្ដែង Cristiano Ronaldo និង Lionel Messi សុទ្ធតែត្រូវបានចុចឈ្មោះដោយ Beckham ដើម្បីនាំយកទៅលេងនៅក្របខណ្ឌ MLS។
“គ្រប់គ្នាសុទ្ធតែមានសេចក្ដីប៉ងប្រាថ្នា។ អ្នកមើលទៅ Leo និង Cristiano ពួកគេនៅអាចលេងបានក្នុងកម្រិតខ្ពស់ ហើយវារឹតតែពិបាកបើសិនជាគេចាកចេញពីក្លិបដែលគេកំពុងតែលេង។ នរណាទៅដឹងថានឹងមានអ្វីកើតឡើងនៅក្នុងបាល់ទាត់?” សម្ដីរបស់ Beckham។
គួរបញ្ជាក់ផងដែរថា កុងត្រារវាង Messi និងក្លិប Barcelona នឹងផុតនៅឆ្នាំ២០២១ ខណៈម្ចាស់ពាន Ballon d’Or ៥ដងលើកនេះអាចចាកចេញពី Barca បានដោយសេរី និងមិនមានតម្លៃខ្លួននៅពេលចប់រដូវកាល ២០១៩-២០២០ ដែលនេះជាអ្វីដែលបានព្រមព្រៀងគ្នា៕
ប្រភព៖ DailyMail
Bong I.T