ស្ត្រីម្នាក់យកទារកទើបកើតបាន៦ថ្ងៃ ទៅលាក់ទុកក្នុងកាបូបស្ពាយដើម្បីលួចឡើងយន្ដហោះ (មានវីដេអូ)

ហ្វីលីពីន៖ កាលពីថ្ងៃទី០៤ ខែកញ្ញា ឆ្នាំ២០១៩កន្លងទៅនេះ ស្ត្រីម្នាក់បានព្យាយាមលាក់ទារកដែលទើបនឹងកើតបាន៦ថ្ងៃ ដាក់ក្នុងកាបូបស្ពាយ ដើម្បីបានឡើងយន្ដហោះចាកចេញពីប្រទេស។

យោងតាមប្រភពបានឲ្យដឹងថា ស្ត្រីជនជាតិអាមេរិកម្នាក់ ឈ្មោះថា Jennifer អាយុ៤៣ឆ្នាំ បានរៀបចំធ្វើដំណើរចេញពីប្រទេសហ្វីលីពីន នៅព្រលានយន្ដហោះ Ninoy Aquino។ នាងបានលាក់ទុកទារកដែលទើបនឹងកើតបាន៦ថ្ងៃ នៅក្នុងកាបូបស្ពាយ។ គោលបំណងរបស់នាងគឺចង់នាំទារកនោះគេចចេញពីប្រទេសហ្វីលីពីន។ ទោះបីជានាងខំប្រឹងលាក់យ៉ាងណាក៏ដោយ បុគ្គលិកនៅទីនោះក៏បានធ្វើការឆែកកាបូប ព្រោះមានការសង្ស័យ។ នៅពេលបើកកាបូបទៅ ក៏ប្រទះឃើញទារកនៅក្នុងនោះពិតមែន។

ប្រភពបានបន្ដថា ទារកនោះគឺគ្មានលិខិតឆ្លងដែនទេ នេះជាហេតុដែលនាងព្យាយាមលាក់ទារកក្នុងកាបូបស្ពាយ។ នាង Jennifer បានអះអាងថាខ្លួននាងជាមីងរបស់ទារកនោះ ប៉ុន្ដែគ្មានឯកសារដើម្បីបញ្ជាក់ការពិតនោះទេ។ ទារកក៏ត្រូវបានប៉ូលិសបញ្ជូនទៅកាន់មន្ទីរពេទ្យ ដើម្បីធ្វើការពិនិត្យសុខភាព។

យ៉ាងណាមិញ នាង Jennifer ត្រូវហាមឃាត់ពីការហោះហើរចេញពីប្រទេស និងជុំវិញករណីនេះ ប៉ូលិសកំពុងធ្វើការស៊ើបអង្កេតបន្ថែម ដោយសារតែនាង Jennifer មិនព្រមផ្ដល់ព័ត៌មានច្បាស់លាស់៕ 

សូមទស្សនារូបភាពនិងវីដេអូខាងក្រោម៖