មិនស្រលាញ់ប្រពន្ធបែបណាក៏ដោយមិនគួរធ្វើបាបចិត្តប្រពន្ធដល់ថ្នាក់នេះទេ។ តើបងប្អូនអ្នកអានមានមតិយ៉ាងណា ខ្លះចំពោះករណីប្តីប្រពន្ធនេះ?
រាជធានីភ្នំពេញ ៖ បុរសម្នាក់បានរងនូវភាពអាម៉ាស់ និងបាក់មុខមាត់ដោយសារដឹកស្រីស្នេហ៍ទាំងថ្ងៃយកទៅផ្ទះបញ្ឈឺប្រពន្ធ ត្រូវប្រពន្ធជិះម៉ូតូដេញតាមទាន់ស្ទាក់ផ្លូវ ចាប់ប្រតាយប្តីឱ្យចេញពីរថយន្ត ហើយក៏ផ្ទុះហិង្សាទាញដុំថ្មគប់បែរជាទៅត្រូវរថយន្តម៉ាកតូយ៉ូតាកាមរីហាយប្រ៊ីដ ស៊េរី២០០៧ របស់ព្រះរាជអាជ្ញារងខេត្តកណ្តាលម្នាក់ ដែលធ្វើដំណើរតាមផ្លូវស្របគ្នាបណ្តាលឱ្យបែកកញ្ចក់ចំហៀងខាងស្តាំ ។
ហេតុការណ៍នេះ បានធ្វើឱ្យមានការភ្ញាក់ផ្អើលកាលពីវេលាម៉ោង១១ និង៣០នាទីព្រឹកថ្ងៃទី២ មករា ឆ្នាំ២០១២ មុខភោជនីយដ្ឋាននិស្ស័យសមុទ្រ ស្ថិតនៅតាមផ្លូវលេខ២៦៥ កែងវិថីឧកញ៉ាទេពផន ក្នុងសង្កាត់ទឹកល្អក់ទី២ ខណ្ឌទួលគោក។ នៅក្នុងហេតុការណ៍នេះដែរ ស្រ្តីជាប្រពន្ធក៏បានរងរបួសមុតដៃដោយសារចាប់ប្រវាយប្រតប់កាច់បំបាក់ផ្លិតសម្រាប់បាញ់លាងកញ្ចក់រថយន្ត ដើម្បីវាយប្តីដែលក្រាញមិនព្រមចុះចេញពីក្នុងរថយន្ត ។ បុរសដែលដឹកស្រី ហើយប្រពន្ធតាមទាន់នោះ ឈ្មោះហែម វិសាល អាយុ៣០ឆ្នាំ ប្រពន្ធឈ្មោះឈាង ចាន់ធា អាយុ២៤ឆ្នាំ មានទីលំនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ ចំណែកស្ត្រីដែលលង់ស្នេហ៍ប្តីគេនោះឈ្មោះដុះ វ៉ារី អាយុ២៨ឆ្នាំ ជាកម្មកររោងចក្រកាត់ដេរហ្វាន់ទ័រ ស្នាក់នៅផ្ទះជួលក្នុងសង្កាត់បឹងកក់ទី២ ខណ្ឌទួលគោក ។
តាមសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុ គេឃើញបុរសជាប្តីបានបើករថយន្តម៉ាកកូរ៉ូឡា ស៊េរី៩៤ ពណ៌ឈាមជ្រូកមួយគ្រឿងបញ្ជិះស្រីស្នេហ៍ធ្វើដំណើរតាមផ្លូវ។ នៅពេលធ្វើដំណើរមកដល់ចំណុចមុខភោជនីយដ្ឋាននិស្ស័យសមុទ្រ ស្រាប់តែមានម៉ូតូម៉ាកស្តេប ពណ៌ខ្មៅមួយគ្រឿងជិះគ្នា២នាក់ស្ទាក់ពីមុខរថយន្ត ។ ភ្លាមនោះស្រាប់តែស្ត្រីម្នាក់ដែលគេស្គាល់ថា ជាប្រពន្ធស្របច្បាប់បានស្ទុះទៅចាប់ទាញបុរសជាប្តីឱ្យចេញពីរថយន្ត តែប្តីមិនព្រមចេញ ។ ប្រតិកម្មរបស់ស្ត្រីជាប្រពន្ធ គឺមានបំណងរកវាយស្ត្រីម្នាក់ដែលជិះក្បែរប្តីជាស្រីស្នេហ៍ផងដែរ ។
តាមសាក្សីបន្តទៀតថា នៅក្នុងហេតុការណ៍នោះដោយសារតែមានកំហឹងចំពោះប្តីដឹកស្រីទាំងថ្ងៃ ស្ត្រីជាប្រពន្ធបានចាប់ទាញកាច់ដងផ្លិតសម្រាប់បាញ់ទឹកលាងកញ្ចក់រថយន្តមកវាយប្តី បណ្តាលឱ្យមុតដៃខ្លួនឯង ហើយក៏យកដុំថ្មប៉ុនកំភួនដៃគប់តម្រង់ប្តី និងស្រីស្នេហ៍ដែលនៅក្នុងរថយន្ត តែដុំថ្មបែរជាហោះទៅត្រូវកញ្ចក់
រថយន្តម៉ាកតូយ៉ូតាកាមរីហាយប្រ៊ីដ ស៊េរីឆ្នាំ២០០៧ ពណ៌ទឹកប្រាក់មួយគ្រឿងរបស់លោកចាំង សុជាតិ ព្រះរាជអាជ្ញារងខេត្តកណ្តាលដែលធ្វើដំណើរតាមដងផ្លូវ បណ្តាលឱ្យបែកកញ្ចក់ទ្វារខាងស្តាំ ។
នៅក្នុងហេតុការណ៍នោះ លោកព្រះរាជអាជ្ញារងក៏បានឈប់រថយន្តភ្លាមទាមទារសំណងការខូចខាតកញ្ចក់រថយន្ត និងបានបង្កឱ្យមានការភ្ញាក់ផ្អើលយ៉ាងខ្លាំងដល់មនុស្សរាប់សិបនាក់នាំគ្នាចោមរោមមើល ធ្វើឱ្យមានការកកស្ទះចរាចរណ៍។ បន្តិចក្រោយមក គេឃើញប៉ូលិសប៉ុស្តិ៍ទឹកល្អក់ទី២ ចុះទៅសម្របសម្រួល ហើយនាំប្តីប្រពន្ធ និងស្រីស្នេហ៍ទៅប៉ុស្តិ៍ និងដោះស្រាយសងការខូចខាត ។
តាមស្ត្រីឈ្មោះឈាង ចាន់ធា បានឱ្យដឹងថា នាងជាប្រពន្ធស្របច្បាប់ដែលបានរៀបការជាមួយឈ្មោះហែម វិសាល តាំងពីឆ្នាំ២០០៩ មកម្លេ៉ះ និងមានកូនប្រុសម្នាក់អាយុទើបតែ៦ខែ។ នៅពេលដែលនាងជាប្រពន្ធឆ្លងទន្លេ ប្តីបានចុះចោលផ្ទះ ហើយទៅលួចមានស្រី ថែមទាំងសុំយកស្រីនោះមករស់នៅផ្ទះជាមួយគ្នាទៀត។ នាងនិយាយថា សុខចិត្តឱ្យប្តីយកស្រីមួយទៀតទៅចុះ តែសុំកុំយកមកដេកនៅក្នុងផ្ទះ និងកុំភ្លេចប្រពន្ធកូនឱ្យសោះ។ ស្ត្រីឈ្មោះឈាង ចាន់ធា បានបន្តទៀតថា នៅមុនពេលកើតហេតុ បន្ទាប់ពីបាត់ប្តីមិនឃើញចូលផ្ទះច្រើនថ្ងៃ ស្រាប់តែឃើញចូលផ្ទះវិញ ដោយនាំស្រីស្នេហ៍មកជាមួយទៀត។ លុះនៅផ្ទះមួយសន្ទុះ ក៏បានបើករថយន្តចេញវិញ ហើយត្រូវនាងរួមទាំងប្អូនបានជិះម៉ូតូដេញតាម ។ ស្ត្រីជាប្រពន្ធរូបនោះបាននិយាយទៀតថា ពេលបើកម៉ូតូដេញតាមទាន់ឱ្យឈប់ មិនព្រមឈប់ ទើបនាងបានបើកម៉ូតូស្ទាក់ផ្លូវរួចទាញប្តីឱ្យចេញមកក្រៅនិយាយគ្នាសិន តែប្តីមិនព្រមចេញ នាងក៏បានទាញដុំថ្មគប់ប្តី តែទៅត្រូវរថយន្តគេដែលកំពុងធ្វើដំណើរតែម្តង ។
ចំណែកស្ត្រីឈ្មោះដុះ រ៉ានី ជាស្រីស្នេហ៍បានឱ្យដឹងថា នាងមានទំនាក់ទំនងស្នេហាជាមួយឈ្មោះហែម វិសាល រយៈពេល៣ខែមកហើយ ។ ទោះបីជាយ៉ាងណា ស្ត្រីរូបនោះមិនឱ្យដឹងច្រើនឡើយ សូម្បីតែឈ្មោះ ក៏មិនប្រាប់ឱ្យដឹងដែរ ។ រីឯបុរសឈ្មោះហែម វិសាល ពេលដែលកោះសន្តិភាពសុំការបំភ្លឺ ពុំបាននិយាយប្រាប់អ្វីឡើយ ។ មិនត្រឹមតែប៉ុណ្ណោះ ក៏បានប្រាប់ប្រពន្ធកុំឱ្យនិយាយច្រើនពេក ព្រោះអ្នកកាសែតចាំយកព័ត៌មាននាំខ្មាសគេ ។ នៅស្នាក់ការប៉ុស្តិ៍ លោកព្រះអាជ្ញារងខេត្តកណ្តាលបានទារសំណងការខូចខាតកញ្ចក់រថយន្តចំនួន៥០០ដុល្លារ ហើយភាគីបង្ក ក៏បានយល់ព្រម ។
ទោះបីជាយ៉ាងណាក្តី នៅរសៀលនេះសមត្ថកិច្ចកំពុងសាកសួរ និងដោះស្រាយគ្នានៅឡើយ ៕
ដកស្រង់ពីកោះសន្តិភាព
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
