ចិន៖ រូបថតមួយសន្លឹកកំពុងទទួលបានការកោតសរសើរយ៉ាងខ្លាំងពីមហាជន ដែលបង្ហាញឲ្យឃើញវេជ្ជបណ្ឌិតម្នាក់កំពុងសម្រាកនៅលើឥដ្ឋ ក្រោយពីវះកាត់ឲ្យអ្នកជំងឺចំនួន៧ដងជាប់គ្នា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រភពបានឲ្យដឹងថា លោកវេជ្ជបណ្ឌិត Dai Yu គឺជាអនុប្រធាននៃនាយកដ្ឋានផ្នែកឆ្អឹង នៅមន្ទីរពេទ្យ Longgang Central ក្នុងទីក្រុង Shenzhen ប្រទេសចិន។ លោកវេជ្ជបណ្ឌិត ព្រមទាំងគ្រូពេទ្យផ្សេងៗទៀតមានភារកិច្ចក្នុងការវះកាត់ចំនួន១០ដង នៅក្នុងថ្ងៃនោះ។ ការវះកាត់អ្នកជំងឺគឺចាប់ផ្ដើមពីម៉ោង៨:០០នាទីព្រឹក និងត្រូវធ្វើការវះកាត់ចំនួន៧ដងជាប់គ្នា ដោយមិនបានសម្រាកបន្ដិចឡើយ។
ប្រភពបានបន្ដថា បន្ទាប់ពីវះកាត់៧ដងរួចមក លោកវេជ្ជបណ្ឌិតត្រូវត្រៀមការវះកាត់បន្ដទៀតនៅវេលាម៉ោង ៥:០០នាទីល្ងាច។ ឆ្លៀតពេលនោះ លោកវេជ្ជបណ្ឌិតក៏បានដាក់ខ្លួនអង្គុយសម្រាកទៅលើឥដ្ឋប្រមាណ១០នាទី នៅក្នុងបន្ទប់វះកាត់ផ្ទាល់តែម្ដង។ គ្រូពេទ្យម្នាក់ឃើញដូច្នេះក៏បានថតរូបលោកវេជ្ជបណ្ឌិតមួយន្លឹកទៅបង្ហោះនៅលើបណ្ដាញសង្គម ធ្វើឲ្យមហាជនជាច្រើនកោតសរសើរថា គាត់គឺពិតជាវីរបុរសពិតមែន។ លោកវេជ្ជបណ្ឌិតបានបន្ទាបខ្លួនពីការសរសើរ ដោយនិយាយថា គាត់គ្រាន់តែបំពេញតួនាទីជាវេជ្ជបណ្ឌិតប៉ុណ្ណោះ ដែលត្រូវធ្វើឲ្យអ្នកជំងឺជាសះស្បើយបានលឿនតាមដែលអាចធ្វើទៅបាន។ សម្រាប់ការវះកាត់ទាំងអស់ត្រូវបានបញ្ចប់ត្រឹមម៉ោង៩:០០នាទីយប់ក្នុងថ្ងៃដដែល។
យ៉ាងណាមិញ ក្រោយពីមានការសរសើរ ក៏មានមហាជនមួយចំនួនមានមតិថា ហេតុអ្វីបានជាមានការវះកាត់ជាច្រើនដងក្នុងថ្ងៃតែមួយ គួរតែមានពេលសម្រាកសម្រាប់វេជ្ជបណ្ឌិតនិងក្រុមគ្រូពេទ្យ ដើម្បីឲ្យពួកគេអាចបំបាត់ភាពតានតឹងនិងស្មុគស្មាញបានខ្លះ៕
តើប្រិយមិត្តអ្នកអានយល់ឃើញយ៉ាងណាដែរ?