Barcelona ចង់លក់កីឡាករឆ្នើមម្នាក់នេះចេញ ដើម្បីបង្រ្គប់លុយទិញ Neymar

អេស្ប៉ាញ៖ ក្លិប Barcelona បានបដិសេធសំណើសុំខ្ចីជើងកីឡាករខ្សែបម្រើ Arturo Vidal ពីក្លិប Inter Milan នេះបើតាមប្រភពព័ត៌មានក្នុងប្រទេសអេស្ប៉ាញ។

Inter Milan បានដាក់ការចង់បានមកលើខ្សែបម្រើជម្រើសជាតិឈីលីនេះតាំងពីដើមរដូវក្ដៅលើកនេះមកម្ល៉េះ ប៉ុន្តែក្លិបនៅអ៊ីតាលីមួយនេះចង់បានក្រោមលក្ខខណ្ឌខ្ចីជើងប៉ុណ្ណោះ ខណៈសំណើនេះត្រូវបាន Barcelona បដិសេធមិនយល់ព្រមឲ្យកីឡាករដែលខ្លួនទិញមកពី Bayern Munich ជាមួយតម្លៃខ្លួន ២៧លានផោន ចាកចេញក្នុងលក្ខខណ្ឌខ្ចីជើងនោះទេ។

បើយោងតាម Mundo Deportivo ក្លិប Barcelona មានបំណងចង់លក់ Vidal ក្នុងតម្លៃដើមដែលទិញមកគឺ ២៧លានផោន ដើម្បីយកលុយទៅទិញខ្សែប្រយុទ្ធ Neymar ត្រឡប់មកកាន់កីឡដ្ឋាន Nou Camp វិញឲ្យបានមុនទីផ្សារដោះដូរកីឡាករបិទ។

Neymar ត្រូវបានគេមើលឃើញថាអាចនឹងត្រឡប់មកចូលរួមជាមួយ Barcelona វិញឲ្យបានមុនថ្ងៃទី២ ខែកញ្ញា ដោយសារតែគេមិនសប្បាយចិត្តជាមួយនឹងជីវិតនៅទីក្រុងប៉ារីស និងមានបំណងងាកក្រោយមកលេងនៅទឹកដីអេស្ប៉ាញវិញ។

ទន្ទឹមនឹងនេះផងដែរ ក្លិបអ្នកមាននៅបារាំង Paris Saint-Germain ក៏ចង់លក់កំពូលខ្សែប្រយុទ្ធ Neymar ចេញផងដែរបន្ទាប់ពីគេបង្ហាញអាកប្បកិរិយាមិនចង់រួមរស់ជាមួយក្លិបបន្ត ប៉ុន្តែក្លិបមានមូលដ្ឋាននៅទីក្រុងបារីស មួយនេះបានទាមទារតម្លៃខ្លួនរហូតដល់ ២២៨លានផោនឯណោះសម្រាប់ក្លិបផ្សេងៗដែលចង់បាន Neymar៕

ប្រភព៖ DailyMail