ទោះបីជាគ្មានវត្តមានMina ប៉ុន្តែសមាជិក TWICE នៅតែទុកចន្លោះឈរមួយលើឆាក សម្រាប់នាង!

កូរ៉េខាងត្បូង៖ ប្រសិនបើប្រិយមិត្តជាអ្នកតាមដានវិស័យKPOP ជាពិសេសអ្នកគាំទ្ររបស់ក្រុមចម្រៀងនារីកូរ៉េល្បីឈ្មោះ TWICE ប្រាកដជាបានដឹងរួចមកហើយថា​ សមាជិកមួយរូបរបស់ TWICE គឺMina ដែលនាងត្រូវបានផ្អាកសកម្មភាពជាមួយក្រុមមួយរយៈ ដើម្បីសម្រាកមើលថែសុខភាពរបស់នាង។ ហេតុដូច្នេះហើយ ការសម្តែងមួយរយៈចុងក្រោយនេះ មិនមានវត្តមានរបស់ Mina នោះទេ។

បើទោះបីជាបែបនេះក្តី ប៉ុន្តែសមាជិករបស់TWICEទាំងអស់ មិនដែលភ្លេចមិត្តរួមក្រុមនោះដែរ។ ជាក់ស្តែង កាលពីម្សិលមិញនេះក្រុមចម្រៀងនារីTWICE បានទៅចូលរួមនៅក្នុងកម្មវិធីពានរង្វាន់តន្ត្រី Saribada Awards។

ក្រោយពីសម្តែងបទចម្រៀងនៅលើឆាកចប់ ពួកគេក៏បានអោនគោរពអ្នកទស្សនា។ តែអ្វីដែលធ្វើអ្នកគ្រប់គ្នាចាប់អារម្មណ៍នោះគឺ ពួកគេបានទុកចន្លោះឈរមួយសម្រាប់ Mina។ ដោយសមាជិកទាំងអស់ត្រូវកាន់ដៃគ្នា ប៉ុន្តែJihyo បានទុកចន្លោះមួយរវាងនាងនិង Chaeyoung ដើម្បីជំនួសកន្លែងឲ្យ Mina។

ក្រោយពីបានឃើញបែបនេះភ្លាម អ្នកគាំទ្រមានអារម្មណ៍រំភើប និងនិយាយពាក្យសរសើរទៅកាន់ពួកគេគ្រប់ៗគ្នា។ ម្យ៉ាងវិញទៀតនេះមិនមែនជាលើកទីមួយទេ គឺចាប់តាំងពីពេលដែល Minaសម្រាកមក ពួកគេតែងតែទុកកន្លែងឲ្យនាងបែបនេះជានិច្ច ធ្វើដូចជាសមាជិកមកគ្រប់គ្នាទាំង៩នាក់ដូច្នោះដែរ៕​

សូមទស្សនារូបភាពខាងក្រោម៖