ខេត្តព្រះសីហនុ ៖ បើទោះបីរកឃើញថា ជាការធ្វើអត្តឃាតដែលប្រពន្ធជាអ្នកដាក់ថ្នាំពុល ក៏មិនមានការបង្ហាញថា តើថ្នាំពុលដែលដាក់សម្លាប់ប្តីនិងកូន ព្រមទាំងខ្លួនឯងនោះជាថ្នាំអ្វីនៅឡើយទេ ហើយមូលហេតុពិតប្រាកដក៏មិនត្រូវបានដឹងដែរ ក្រៅពីការសន្និដ្ឋានថា មកពីការរស់នៅមិនចុះសម្រុងនឹងគ្នាតែប៉ុណ្ណោះ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសូមបញ្ជាកក់ធា មានការភ្ញាក់ផ្អើលឆោឡោមួយបានផ្ទុះឡើងកក្រើកក្រុងព្រះសីហនុ ខណៈគ្រប់គ្នាបានដឹងថា គ្រួសារមួយមានគ្នា៣នាក់បានស្លាប់ទាំងអស់គឺ ប្ដី ប្រពន្ធ និងកូនស្រី បន្ទាប់ពីហូបចំណីអាហាររួច ។ ហេតុការណ៍នេះ កើតឡើងកាលវេលាម៉ោងប្រមាណ៨យប់ថ្ងៃទី២០ ខែសីហា នៅក្រោយផ្សារពាណិជ្ជកម្ម ស្ថិតក្នុងភូមិ៣ សង្កាត់លេខ២ ក្រុងព្រះសីហនុ ។
ទាក់ទិនទៅនឹងរឿងរ៉ាវស្ទើរតែមិនគួរឱ្យជឿនេះ តាមប្រភពពីប្អូនស្រីខាងប្រពន្ធឱ្យដឹងថា មុនកើតហេតុនាងបានទូរស័ព្ទមកបងស្រីក្នុងបំណង បបួលទៅហូបអាហារនៅខាងក្រៅ ប៉ុន្តែនាងទូរស័ព្ទជាច្រើនលើកច្រើនសាមិនចូល ក៏សម្រេចចិត្តទៅហៅដោយផ្ទាល់ ស្រាប់តែឃើញផ្ទះបិទទ្វារហើយហៅក៏គ្មានការឆ្លើយតប ។ ពេលនោះនាងបានរកអ្នកជិតខាង និងប្តឹងសមត្ថកិច្ចឲ្យជួយគាស់ទ្វារដើម្បីចូលទៅមើលតើមានរឿងអ្វី ។
នៅពេលបើកទ្វារចូលទៅ ពុទ្ធោអើយ ! រឿងរ៉ាវដ៏រន្ធត់មួយបានកើតឡើង ដោយឃើញបងថ្លៃស្លាប់ក្នុងស្ថានភាពអង្គុយផ្អែកមាត់ទ្វារបន្ទប់ទឹក និងក្មួយស្រីស្លាប់លើកម្រាលឥដ្ឋ ឯបងស្រីនៅមានដង្ហើម ទើបកម្លាំងសមត្ថកិច្ចចាត់បញ្ជូនទៅសង្គ្រោះបន្ទាន់នៅមន្ទីរពេទ្យ តែជាអកុសលបងស្រីបានស្លាប់នៅមន្ទីរពេទ្យ។ ប្រភពពីប្អូនស្រីដដែលឱ្យដឹងទៀតថា ជនរងគ្រោះទាំង៣នាក់ ប្តីឈ្មោះ លី ខេង អាយុ៤៣ឆ្នាំ មុខរបរម៉ៅការជាងកញ្ចក់ ប្រពន្ធឈ្មោះ ម៉ីង ចាន់ផល អាយុ៤១ឆ្នាំ មុខរបរអ៊ុតសក់ និងកូនស្រីឈ្មោះ លី ខេងអាយ អាយុ១២ឆ្នាំ ។
យោងតាមអ្នកជិតខាងឱ្យដឹងថា ផ្ទះគ្រួសារខាងលើនេះពុំឃើញបើកទ្វារតាំងពីព្រឹកមកម្លេ៉ះប៉ុន្តែពុំមានអ្នកចាប់អារម្មណ៍ថា មានរឿងអ្វីកើតឡើងនៅខាងក្នុងនោះទេ ។ ជុំវិញករណីស្លាប់មួយគ្រួសារ ប្តី ប្រពន្ធ និងកូននេះ ពុំមានប្រភពណាមួយអះអាងថាបណ្តាលមកពីអ្វីឡើយ ហើយសមត្ថកិច្ចជំនាញបានធ្វើកោសល្យវិច័យ ដើម្បីរកមូលហេតុដែលបណ្តាលឲ្យមានការស្លាប់ទាំងគ្រួសារបែបនេះ ។
ការស្លាប់មួយគ្រួសារគួរឱ្យភ្ញាក់ផ្អើលនេះដែរ ស្នងការនគរបាលខេត្ត លោកឧត្តមសេនីយ៍ទោ ជួន ណារិន្ទ បានប្រាប់បណ្ដាញព័ត៌មាននៅព្រឹក ថ្ងៃទី២១ ខែសីហាថា នៅពេលសមត្ថកិច្ចជំនាញ សហការជាមួយគ្រូពេទ្យធ្វើកោសល្យវិច័យសពរកឃើញថា នេះជាករណីអត្តឃាត ដោយប្រពន្ធជាអ្នកដាក់ថ្នាំពុលក្នុងអាហារ ដើម្បីបំពុលប្ដីនិងកូនមុន ហើយខ្លួនឯងតាមក្រោយ ។ គ្រូពេទ្យជំនាញក៏បានសន្និដ្ឋានដែរថា ចំពោះប្តី និងកូនបានស្លាប់រយៈពេល២០ម៉ោងទៅហើយ ទើបបានដឹង ។
លោកស្នងការបញ្ជាក់ថា ឆ្លងតាមការស្រាវជ្រាវសមត្ថកិច្ចបានរកឃើញ៖ ទី១-ជាតិថ្នាំក្នុងអាហារដែលជនរងគ្រោះទទួលទាន ។ ទី២-ផ្ទះចាក់សោពីខាងក្នុងដែលបង្ហាញថា គ្មានអ្នកក្រៅទាក់ទិនទេ និងទី៣-ប្ដីប្រពន្ធនេះតែងតែឈ្លោះប្រកែកគ្នា ពោលគឺរស់នៅមិនសូវចុះសម្រុងនឹងគ្នាទេ ។ សពអ្នកទាំង៣ ត្រូវបានយកទៅតម្កល់នៅវត្តឥន្ទញ្ញាណហៅវត្តក្រោម ស្ថិតក្នុងសង្កាត់លេខ៣ ក្រុងព្រះសីហនុ ដើម្បីឲ្យក្រុមគ្រួសារធ្វើបុណ្យតាមប្រពៃណី៕
ប្រភព៖ កោះសន្តិភាព
Bong I.T