រាជធានីភ្នំពេញ ៖ បុរសម្នាក់បានកាន់រូបថតអាពាហ៍ពិពាហ៍ដែលថតរួមគ្នាជាមួយប្រពន្ធចំនួន២សន្លឹកជាភស្តុតាង រួចធ្វើដំណើរទៅកាន់សាលាសង្កាត់ចោមចៅ៣ ខណ្ឌពោធិ៍សែនជ័យ កាលពីវេលាម៉ោង១១ព្រឹកថ្ងៃទី២២ ខែសីហា ដើម្បីសុំឲ្យអាជ្ញាធរជួយអន្តរាគមន៍ស្វែងរកប្រពន្ធឲ្យចូលខ្លួនមកដោះស្រាយគ្នា ដោយបុរសម្នាក់នេះបានចោទប្រកាន់ថា គ្រាន់តែមានរឿងឈ្លោះគ្នាបន្តិបន្តួចសោះ ស្រាប់តែនាងជាប្រពន្ធបានប្រមូលសម្ភារៈក្នុងផ្ទះដូចជា ដីធ្លី និងម៉ូតូ១គ្រឿងផងលក់យកលុយ ព្រមទាំងដេញតុងទីថែមទៀតផង រួចប្រមូលយកលុយ និងវេចបង្វិចរត់ចោលខ្លួនបាត់ស្រមោលជាង១០ថ្ងៃកន្លងមកហើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបុរសម្នាក់ខាងលើនេះបានប្រាប់អាជ្ញាធរថា គាត់ឈ្មោះ ចេង ពិសិដ្ឋ អាយុ២៧ឆ្នាំ មុខរបរកម្មកររោងចក្រ ស្នាក់នៅបន្ទប់ជួលក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។ ចំណែកស្ត្រីជាប្រពន្ធឈ្មោះ សៅ រដ្ឋា អាយុ៣១ឆ្នាំ មុខរបរកម្មការនីរោងចក្រ មានស្រុកកំណើតនៅក្នុងភូមិព្រែកឪជ្រឹង( ក ) ឃុំព្រែករំដែង ស្រុកស្រីសន្ធរ ខេត្តកំពង់ចាម ហើយនាងជាប្រពន្ធបានរត់ចោលគាត់អស់រយៈពេល១១ថ្ងៃកន្លងមកហើយ ដែលពុំដឹងថា នាងទៅទីណា ឬចាញ់បោកប្រុសព្រានណាម្នាក់នោះឡើយ។
បុរសដដែលបានបន្តថា គាត់និងប្រពន្ធបានរៀបការជាមួយគ្នាត្រឹមត្រូវតាមច្បាប់និងប្រពៃណីតាំងពីអំឡុងឆ្នាំ២០១៥មកម៉្លេះ ដែលគិតរហូតមកទល់ពេលនេះមានរយៈពេលជាង៣ឆ្នាំមកហើយ ប៉ុន្តែមិនទាន់មានកូននៅឡើយទេ ព្រោះអត់ទាន់ចង់បានកូន ដោយសារតែជីវភាពខ្វះខាត និងគិតគូរសន្សំលុយកាក់ឲ្យបានធូរធារបន្តិចសិន ហើយចាប់តាំងពីក្រោយពេលរៀបការរួច គាត់បាននាំប្រពន្ធមកស្នាក់នៅធ្វើការជាកម្មករ-កម្មការិនីនៅរាជធានីភ្នំពេញ។
បុរសដដែលបានបន្តថា គាត់និងប្រពន្ធខិតខំធ្វើការខ្លាំងណាស់ និងខំសន្សំប្រាក់មិនហ៊ានចាយវាយផ្ដេសផ្ដាស់នោះទេ រហូតទិញបានម៉ូតូ ដីធ្លី និងសម្ភារៈប្រើប្រាស់ក្នុងផ្ទះបានដូចបំណង ថ្វីដ្បិតតែមានរឿងទាស់ពាក្យសម្ដីគ្នាខ្លះៗដូចចានក្នុងរាវក៏ពិតមែន ប៉ុន្តែមិនធំដុំដល់ថ្នាក់ប្រើហិង្សានោះឡើយ ហើយគាត់តែងតែសង្ឃឹមថានឹងមានសុភមង្គលនៅក្នុងគ្រួសារ ប៉ុន្តែផ្ទុយពីការគិតរបស់គាត់ទាំងស្រុង ដោយសារនៅពេលចុងក្រោយមានទំនាស់គ្នាកើតឡើងជាថ្មីមួយប្រាវ បន្ទាប់មកក៏ស្ងប់ស្ងាត់ទៅវិញ ។
បុរសដដែលបានបន្តទៀតថា លុះដល់ថ្ងៃទី១១ ខែសីហា ឆ្នាំ២០១៩ ស្រាប់តែនាងបានវេចបង្វិចរត់ចោលគាត់បាត់ស្រមោល ដោយលួចលក់ដី ម៉ូតូ និងសម្ភារៈក្នុងផ្ទះអស់គ្មានសល់ឡើយ សូម្បីតែលុយតុងទីនក៏ដេញយកទៅអស់ដែរ គឺទុកឲ្យគាត់ដែលជាប្ដីតែ១០០ដុល្លាប៉ុណ្ណោះ ដោយសារតែបែបនេះទើបគាត់ស្វែងរកការអន្តរាគមន៍ពីអាជ្ញាធរដើម្បីជួយស្វែងរកនាងជាប្រពន្ធឲ្យចូលខ្លួនមកដោះស្រាយគ្នាជាមួយគាត់ឲ្យដាច់ស្រេចសិនមុននឹងចាកចេញទៅ។
បន្ទាប់ពីសមត្ថកិច្ចធ្វើការសាកសួរពីទីកន្លែងស្នាក់នៅ ហើយដឹងថាបុរសម្នាក់ខាងលើនេះស្នាក់នៅផ្ទះជួលក្នុងភូមិត្រពាំងថ្លឹង សង្កាត់ចោមចៅ១ ទើបអាជ្ញាធរសង្កាត់ចោមចៅ៣បានប្រាប់ឲ្យបុរសម្នាក់ខាងលើទៅដាក់ពាក្យបណ្ដឹងនៅទីនោះវិញ ហើយបុរសនោះក៏បានចាកចេញពីសាលាសង្កាត់ចោមច៣បាត់ទៅ ៕
ប្រភព៖ កោះសន្តិភាព