គ្រាន់តែរឿងចប់ភ្លាម Baifern ជាប់នាមជា តារាសម្តែងស្រីលេចធ្លោភ្លែត

ថៃ៖ នៅក្នុងឆ្នាំនេះសង្កេតឃើញថា តារាសម្តែងស្រីវ័យក្មេងBaifern Pimchanok ហាក់ដូចជាមានប្រជាប្រិយភាពខ្លាំង យីអ៊ុនឡើងស្រឺតៗតែម្តង ព្រោះគ្រប់ការសម្តែងរបស់នាងសុទ្ធតែទទួលបានការគាំទ្រពីសំណាក់ទស្សនិកជនទាំងក្នុង និងក្រៅប្រទេស។

ជាក់ស្តែងរឿងភាគថ្មីរបស់នាងដែលមានចំណងជើងថា « Bai Mai Tee Plid Plew » របស់ស្ថានីយទូរទស្សន៍ប៉ុស្តិ៍លេខ១ ត្រូវអ្នកគាំទ្រលើកយកមកនិយាយគ្រប់ៗគ្នា ដោយសាច់រឿងមានភាពប្រទាក់ក្រឡា ទស្សនាហើយជក់ចិត្តដិតអារម្មណ៍តែម្តង។

ជាពិសេសការសម្តែងដ៏ប៉ិនប្រសព្វរបស់Baifern ដោយនាងត្រូវដើរតួជាបុរសកែភេទ និងមានចរិតគុំកួន ចងគំនុំ ហើយនេះជាតួអង្គដែលនាងមិនធ្លាប់លេងពីមុនមកនោះទេ។ ប៉ុន្តែទោះបីជាយ៉ាងណាក៏ដោយ Baifernនៅតែសម្តែងបានល្អឥតខ្ចោះ ហើយថែមទាំងធ្វើឲ្យរឿងនេះ ក្លាយទៅជារឿងភាគដែលមានចំនួនអ្នកទស្សនាច្រើនបំផុត ប្រចាំស្ថានីយទៀតផង។

លើសពីនេះ មិនត្រឹមតែអ្នកគាំទ្រនាំគ្នាសរសើរពីថ្វៃដៃការសម្តែងរបស់នាងនោះទេ ប៉ុន្តែសូម្បីមិត្តរួមសិល្បៈ និងតារាសម្តែងរៀមច្បងជាច្រើន ក៏សរសើរនាងមិនដាច់ពីមាត់ដូចគ្នា។

យ៉ាងណាមិញទោះបីជារឿងភាគនេះបានបញ្ចប់ទៅហើយក៏ពិតមែន ប៉ុន្តែBaifernថែមបានទទួលនាមថ្មីមួយពីអ្នកគាំទ្រថាជា «តារាសម្តែងស្រីលេចធ្លោ» ទៀតផង៕

សូមទស្សនារូបភាពខាងក្រោម៖