អ៊ីតាលី៖ កីឡាករ Cristiano Ronaldo បានបង្ហើបប្រាប់ថាគេអាចនឹងព្យួរស្បែកជើងដើរចេញពីអាជីពជាកីឡាករបាល់ទាត់នៅដំណាច់រដូវកាលនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ខ្សែប្រយុទ្ធជម្រើសជាតិព័រទុយហ្គាល់រូបនេះទើបតែចុះកិច្ចសន្យារយៈពេល ៤ឆ្នាំជាមួយសេះបង្កង់ Juventus កាលពីរដូវក្ដៅរដូវកាលមុន ជាមួយនឹងទំហំទឹកប្រាក់ ១០០លានផោន។ លើសពីនេះទៅទៀតនោះ ម្ចាស់ពាន Ballon D’or ៥សម័យកាលរូបនេះក៏បានជួយឲ្យ Juventus ឈ្នះពាន Serie A ៨រដូវកាលជាប់គ្នាកាលពីរដូវកាលមុនផងដែរ។
យ៉ាងណាមិញ ខ្សែប្រយុទ្ធវ័យ ៣៤ឆ្នាំ Ronaldo បានទម្លាយឲ្យដឹងថាខ្លួនអាចនឹងចូលនិវត្តន៍នៅចប់រដូវកាលនេះ ស្របពេលដែលអ្នកគាំទ្រជាច្រើនចង់ឲ្យគេបន្តបង្ហាញខ្លួននៅលើទីលានរយៈពេលយូរទៅមុខទៀត។ ឆ្លើយសំណួរក្នុងទូរទស្សន៍មួយជុំវិញការចូលនិវត្តន៍ពីអាជីពបាល់ទាត់ Ronaldo លើកឡើងយ៉ាងដូច្នេះថា៖
ខ្ញុំមិនបានគិតអំពីរឿងនេះនោះទេ។ ប្រហែលជាខ្ញុំអាចបញ្ចប់អាជីពរបស់ខ្ញុំនៅឆ្នាំក្រោយ…..ប៉ុន្តែខ្ញុំអាចនៅលេងបានដល់អាយុ ៤០ ឬ ៤១ឆ្នាំ។
គួរបញ្ជាក់ផងដែរថា បើទោះបីជាមានវ័យច្រើនតែពិតមែន ប៉ុន្តែកាលពីរដូវកាលមុន Ronaldo បានរកគ្រាប់បាល់ច្រើនជាងគេឲ្យ Juventus ពោលគឺរហូតដល់ ២១គ្រាប់ឯណោះ៕
ប្រភព៖ Mirror
Bong I.T