កក្រើកលីគកំពូល! នាគខៀវបឹងកេត បើកទ្វារកីឡដ្ឋានខ្លួន ស្វាគមន៍ក្រុមអ្នកមានវិសាខា (មានវីដេអូ)

កម្ពុជា៖ ការប្រកួតពានរង្វាន់លីគកំពូលកម្ពុជា Metfone Cambodian League កាលពីម្សិលមិញ ក្នុងជំនួបសប្ដាហ៍ទី ២០ ក្លិបបាល់ទាត់បឹងកេតអែហ្វស៊ី បានប្រកួតស្មើគ្នាជាមួយ ក្លិបបាល់ទាត់វិសាខា ក្នុងលទ្ធផល ១-១។

នៅក្នុងការប្រកួតនោះ មានការសម្រុកគ្នាទៅវិញទៅមកខ្លាំងមែនទែន ប៉ុន្តែបឹងកេត ជាអ្នកបើកការនាំមុខមុន តាមរយៈការស៊ុតបាល់បញ្ចូលទីពីសំណាក់ខ្សែប្រយុទ្ធស្បែកខ្មៅ Julius Oiboh នៅនាទីទី ២៦។ យ៉ាងណាមិញ រៀបនឹងបញ្ចប់វគ្គទី១ វិសាខា បានតាមស្មើវិញនៅនាទី ៤៥ ដោយការតែតបាល់បញ្ចូលទីយ៉ាងល្អរបស់ខ្សែប្រយុទ្ធពាក់លេខ ៣១ Da Cruz Guardiano Elief។ ចូលមកដល់វគ្គទីពីរ ក្រុមទាំងពីរនៅតែបន្តសម្រុកគ្នា ប៉ុន្តែមិនមានក្រុមមួយណាអាចរកគ្រាប់បាល់បាននោះទេ ដោយលទ្ធផលបញ្ចប់ ៩០នាទី បឹងកេត ស្មើជាមួយ វិសាខា ក្នុងលទ្ធផល ១-១។

ជំនួបមួយនេះអាចរាប់បានថាជាជំនួបដ៍ធំក្នុងលីគកំពូលរបស់កម្ពុជា ដោយខ្សែប្រយុទ្ធកំពូលទាំងពីររបស់កម្ពុជា នឹងត្រូវប្រឈមមុខគ្នាដើម្បីស្វែងរក ៣ពិន្ទុឲ្យក្រុមរៀងៗខ្លួន គឺ ចាន់ វឌ្ឍនាកា (បឹងកេត) និង កែវ សុខផេង (វិសាខា) ។  

គួរបញ្ជាក់ផងដែរថា ការប្រកួតនោះធ្វើឡើងនៅកីឡដ្ឋាន Cambodia Airway ដែលជាកីឡដ្ឋានផ្ទាល់របស់បឹងកេត អមដោយអ្នកគាំទ្រស្ទើរតែពេញកីឡដ្ឋាន ពោលគឺប្រមាណជិត ២ពាន់នាក់។

សូមទស្សនាវីដេអូ Highlight នៃការប្រកួតនៅខាងក្រោម៖