WARNING: Graphic Images
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា មហាសោកនាដកម្មមួយបានកើតឡើងលើទឹកដីថៃ ខណៈរថយន្តម៉ាករថទូ របស់ប្រទេសថៃ បើកបុកគ្នាជាមួយរថយន្តសណ្តោងកង់18បណ្តាលឲ្យជនជាតិឡាវ11នាក់ស្លាប់ និងជនជាតិថៃ-ឡាវ4នាក់ផ្សេងទៀតរងរបួស។ ហេតុការណ៍នេះបានកើតឡើងកាលពីទៀបភ្លឺព្រឹក នាថ្ងៃទី18 ខែសីហា ឆ្នាំ2019 នៅលើដងផ្លូវកំពុងស្ថាបនាមួយកន្លែងមុខសាលាស្រុកវ៉ាំងសំប៊ូន ក្នុងខេត្តស្រះកែវ ។
សេចក្តីរាយការណ៍បន្តថា ក្នុងហេតុការណ៍គួរឱ្យរន្ធត់ខាងលើនេះ ជនរងគ្រោះដែលបានស្លាប់បាត់បង់ជីវិតទាំងអស់11នាក់ ក្នុងនោះប្រុស5នាក់ និងស្រី6នាក់ ដែលសុទ្ធសឹងជាជនជាតិឡាវទាំងអស់ ហើយក្រៅពីនេះក៏មានអ្នករងរបួសចំនួន4នាក់ ក្នុងនោះមានទាំងជនជាតិថៃ និងជនជាតិឡាវផ្សេងទៀត។
បើតាមប្រភពពីកន្លែងកើតហេតុបានឱ្យដឹងថា គ្រោះថ្នាក់ចរាចរណ៍ខាងលើនេះ បង្កឡើងដោយរថយន្តម៉ាករថទូ 15កៅអី ដែលពាក់ស្លាកលេខប្រទេសថៃ 34-0405 បានបើករ៉េចង្កូតឆ្លងទ្រូងផ្លូវ ស្រាប់តែទៅបុករថយន្តធុនធំសណ្តោងកង់18 ដែលកំពុងបើកបរបញ្ច្រាស់ទិសគ្នា បណ្តាលជនរងគ្រោះស្លាប់១១នាក់ និងរងរបួស៤នាក់។
ប្រភពដដែលបន្តថា ក្រោយពេលកើតហេតុរថយន្តសង្គ្រោះមកពី3ស្រុករបស់ប្រទេសថៃ បានរួមគ្នាជួយដឹកជនរងគ្រោះ (អ្នករងរបួស) ទៅសង្គ្រោះបន្ទាន់ផងដែរ។ យ៉ាងណាក៏ដោយ ករណីនេះ បើតាមប្រភពពីប្រទេសថៃ បានបញ្ជាក់ថា អ្នករងគ្រោះមិនមានជនជាតិខ្មែរនោះទេ។ (កែសម្រួលដោយ ៖ បុប្ផា)
WARNING: Graphic Video
ប្រភព៖ កោះសន្តិភាព