ឃាត់ខ្លួនជនសង្ស័យ ៥នាក់ ដកហូតបានលុយបាត និងលុយខ្មែរមួយចំនួន

(កណ្តាល)៖ ជនសង្ស័យ៥នាក់ធ្វើសកម្ម លួចសម្ភារៈរបស់សិក្ខាកាមមន្ត្រីនគរបាលជាតិសាលាលាបណ្ឌិតសភានគរបាលកម្ពុជា ត្រូវកម្លាំងនគរបាលស្រុកកៀនស្វាយ ធ្វើការឃាត់ខ្លួនបាន កាលរសៀលថ្ងៃទី១៣ ខែសីហា ឆ្នាំ២០១៩ នៅចំណុចផ្ទះជួលភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល។

នគរបាលបានឲ្យដឹងថា ជនសង្ស័យដែលឃាត់ខ្លួនបានរួមមាន៖

១៖ ឈ្មោះ រឿន ភណ្ឌ ហៅត្នោត ភេទប្រុស អាយុ១៧ឆ្នាំ ជនជាតិខ្មែរ មានមុខរបរមិនប្រាកដ ជាមុខសញ្ញធ្លាប់ជាប់ពន្ធនាគារខេត្តកណ្តាល រយៈពេល៦ខែ ជាអ្នកធ្វើសកម្មភាពលួច។

២៖ ឈ្មោះ រឿន ចន្ធូ ភេទស្រី អាយុ៣៦ឆ្នាំជនជាតិខ្មែរ។

៣៖ ឈ្មោះ គិន រីណា ភេទប្រុស អាយុ១៥ឆ្នាំ ជនជាតិខ្មែរ។

៤៖ ឈ្មោះ ប៊ុន រត្ន័ ភេទប្រុស អាយុ២៦ឆ្នាំ ជាអ្នកសមគំនិត។

៥៖ ឈ្មោះ គាំ ចាន់ ភេទប្រុស អាយុ៤១ឆ្នាំ ជនជាតិខ្មែរ កំពុងរត់គេចខ្លួន អ្នកទាំងរស់នៅក្នុងភូមិ ឃុំកើតហេតុ។

ចំណែកជនរងគ្រោះមាន២នាក់រួមមាន៖ ១៖ ឈ្មោះ សួស សារ៉ុត ភេទប្រុស អាយុ៥៤ឆ្នាំ មានទីលំនៅភូមិប្រសូត្រ១ ឃុំកណ្តៀងរាយ ស្រុកស្វាយទាប ខេត្តស្វាយរៀង មានមុខរបរនគរបាល មកស្នាក់នៅភូមិឃុំកើតហេតុ និង២៖ ឈ្មោះ តិប រ៉ុម ភេទប្រុស អាយុ៣៧ឆ្នាំ ជនជាតិខ្មែរ មានទីលំនៅភូមិស្វាយឃុំបឹងរាំង ស្រុកកំរៀង ខេត្តបាត់ដំបងមានមុខរបរនគរបាល មកស្នាក់នៅភូមិឃុំកើតហេតុ។ ជនរងគ្រោះទាំងពីរ ជាសិក្ខាកាមសាលាបណ្ឌិតសភានគរបាលកម្ពុជា។

នគរបាលបានបន្តថា មុនពេលកើតហេតុជនរងគ្រោះដេកលង់លក់ នៅក្នុងបន្ទប់ផ្ទះជួលខាងលើរៀងៗខ្លួន ជនសង្ស័យបានផ្លោះរបង ចូលទៅលួចទ្រព្យសម្បត្តិមានខ្សែក ទូរស័ព្ទ និងលុយមួយចំនួនផងដែរ រួចគេចខ្លួនបាត់។ ក្រោយមកទើបជនរងគ្រោះភ្ញាក់ពីដំណេក ទើបដឹងថា បាត់បង់ទ្រព្យសម្បត្តិ ក៏នាំគ្នាមកដាក់ពាក្យបណ្តឹង នៅម៉ោង៨ជាង នៅប៉ុស្តិនគរបាលរដ្ឋបាលដីឥដ្ឋ។

ចំណែកនគរបាល ក្រោយទទួលពាក្យបណ្តឹង លោក ព្រំ សំណាង អធិការនគរបាលស្រុកកៀនស្វាយ កំលាំងប៉ុស្តិសហការជាមួយផ្នែកជំនាញ ដឹកនាំដោយលោកអធិការនគរបាល ស្រុកចុះស្រាវជ្រាវរហូតឃាត់ខ្លួន ជនសង្ស័យបាន៤នាក់។ ចំណែកម្នាក់ទៀត កំពុងរត់គេចខ្លួននាំយកមកកាន់ប៉ុស្តិ៍ដើម្បីសួរនាំ។

នគរបាលបានបន្តថា ក្រោយនាំខ្លួនជនសង្ស័យមកសាកសួរនោះ ជនសង្ស័យបានសារភាពថា ខ្លួនពិតជាបានប្រព្រឹត្តអំពើលួចខាងលើប្រាកដមែន។ បច្ចុប្បន្ននគរបាលស្រុកកៀនស្វាយ កំពុង កសាងសំណុំរឿង បញ្ជូនទៅកាន់ស្នងការដ្ឋាន ចាត់ការទៅតាមនីតិវិធី៕

ប្រភព៖ Fresh News